sábado, 24 de junho de 2017

Horta Sujere Ema Independente iha Governasaun Foun

DILI, (TATOLI) – Premiadu Nobel ba Dame, José Ramos Horta sujere ba partidu ne’ebé sei manán iha eleisaun parlamentár 22 jullu atu konvida ema independente iha governasaun, nune’e bele la’o di’ak.

“Importante maka ida ne’ebé manán tenke hatudu sentidu Estadu, oinsá halibur timoroan hotu-hotu, la’ós sira ne’ebé inklui iha partidu maibé ema sira ne’ebé independente no sosiedade sivíl para tinan lima mai ne’e governasaun sai di’ak liu-tan”, hato’o eis Ministru Negósiu Estranjeiru ba jornalista sira iha Palásiu Prezidénsia Repúblika, ohin, hafoin enkontru ho Xefe Estadu, Francisco Guterres Lú-Olo.

Horta hatutan, nia iha esperansa katak partidu sira ne’ebé iha poténsia boot manán eleisaun maka FRETILIN, CNRT, PD no partidu foun ne’ebé lidera hosi Eis Prezidente Repúblika, Taur Matan Ruak.

Kona-ba sorumutu ne’ebé hala’o ho Prezidente Repúblika, Lú-Olo, ko’alia kona-ba oinsá atu hametin liu-tan páz iha Timor.

Tuir nia haree kampaña parlamentár la’o di’ak no hein katak hotu-hotu simu rezultadu eleisaun.

“Hafoin eleisaun liu, Prezidente Repúblika sei bolu líder partidu polítiku sira atu haree oinsá iha tinan lima mai ne’e túr hamutuk kontribui hametin páz no estabilidade iha Timor”, dehan.


Eis diplomata ne’e hatutan polítika internasionál mós prioridade ba Timor-Leste no Prezidente Repúblika. Polítika internasionál maka relasaun ho Indonézia, Austrália, Nova Zelandia, Xina, Japaun, Korea, Portugal no nasaun sira seluk tan.

“Ha’u kontenti katak laiha pontu devista ne’ebé diferente. Prezidenti atuál iha ona esperiénsia tanba uluk hanesan Prezidente Parlamentu Nasionál, akompaña polítika Estadu nian.  Ne’e duni, ha’u hateten de’it ba Prezidente katak kona-ba polítika internasionál, ha’u prontu apoiu ha’u nia opiniaun kuandu xefe Estadu presiza”, katak tan.

Jornalista: Xisto Freitas | Editora: Rita Almeida

Foto: Eis Prezidente Repúblika, José Ramos Horta ko'alia ba jornalista sira iha Palásiu Prezidensiál, ohin. Imajen Ajénsia TATOLI/Xisto Freitas

Sem comentários: