quinta-feira, 22 de junho de 2017

AK Colmera Garante Seguransa, Elpar Kontroladu

DILI - Autoridade Komunitariu (AK) Suku Colmera, Postu Administrativu Vera-cruz garante katak, seguransa Eleisaun Parlamentar iha Suku Colmera   sei lao hakmatek. Tanba Colmera iha aldeia rua deit nee duni fasil batu kontrola.

Tuir Xefe Suku Colmera, Almenio A. da Silva katak atu tama ba eleisaun nuudar autoridade sei halo avizu ba komunidade sira katak, uainhira besik eleisaun ida-idak ba vota ho konsensia, no segredu. Labele halo konflito iha fatin eleisaun tanba nee hanesan festa demokrasia ba povu hotu iha Timor laran tomak.

Preokupa deit mak komunidade sira seluk aproveita halo problema iha suku laran. Tanba iha eleisaun ema hotu lao ba mai, ida nee mak hanesan preokupasaun.

“Hau hanoin Suku Colmera fatin neebe identika fatin konflito nee laiha, tanba Colmera iha aldeia rua deit, neebe hau garante katak iha suku nee sei lao hakmatek iha festa demokrasia,”Almenio informa ba STL, Segunda (19/6/2017) iha Sede Suku Kolmera.

Maske nunee katak, Almenio, antisipasaun presiza tanba ho situasaun sira hanesan nee komunidade sira iha aldeia seluk bele mai halo fali problema iha suku laran. Dala ruma komunidade.


Nunee mos, liu husi festa demokrasia neebe mak sei monu iha (22/7/2017), iha Suku Colmera fatin neebe  identifika atu halo votasaun  iha Jardin Ministeriu Publiku nian oin, tanba fatin nee mak sai sentru ba  komunidade Colmera.

Nee duni, husu ba komunidade sira karik iha partidu politiku balun mai halo kampanha iha suku laran, diak liu ida-idak hakmatek, hodi rona programa neebe sira hatoo.  Liu husi programa neebe sira hatoo diak, iha eleisaun bele ba vota maibe vota ho konsensia no segredu.

Nunee mos, ba joven Colmera karik iha tempu kampanha partidu politiku balun koalia uza politiku oin-oin hatun malu ka nusa ida nee sira ida-idak nian politiku, neebe husu ba komunidade sira ou povu kiik sira keta tau tan kanuru tohar ba iha partidu politiku sira nian programa.

Iha fatin hanesan Manuel Amaral nuudar Xefe Aldeia Manu Fuik hateten, eleisaun mai komunidade tomak hatene hotu ona konaba festa nee rasik. Laos ba komunidade balun deit maibe komunidade hotu-hotu komemora hotu festa. Festa demokrasia nee nia mos garante katak iha sira nian suku rasik sei lao hakmatek.

“Hau sente katak seguransa lao hakmatek tanba ita haree ba  eleisaun prezidente neebe  liu ona komunidade sira ida-idak ba vota hakmatek. Tanba nee hau garante iha suku nee rasik sei lamosu problema ruma tanba komunidade sira mos komprende hotu ona katak festa nee lao ba ema husi nasaun seluk nian maibe festa nee ba Timor-oan nian, tanba nee hau garante suku nee sei laiha problema ruma,”katak Manuel.

Nia mos husu ba joven no komunidade sira husi Aldeia Manu Fuik kria unidade, amizade atu nunee iha leisaun nee lao hakmatek. Tanba nasaun nee foin hamriik tan nee hatudu ita nian maturnidade diak. Atu nunee hatudu ba mundu seluk katak, maske Timor foin ukun-aan maibe iha unidade.

Teofilo Saldanha Soares, nuudar Xefe Aldeia Rai Nain dehan, partidu politiku mai halo kampanha iha suku laran ita rona no haree deit, nunee bele identifika parpol ida-idak nian programa hodi hein too loron votasaun foin bele determina.Est-5

Suara Timor Lorosae

Sem comentários: