domingo, 28 de maio de 2017

SEPFOPE Orienta Grupu Vulnerável Ba Merkadu Traballu

DILI, (TATOLI) – Diretór sira hosi Sekretaria Estadu Polítika Formasaun, Profisionál no Empregu (SEPFOPE) hamutuk ho reprezentante Konfederasaun Sindikatu Traballadór Timor-Leste (KSTL) no Kámara Komersiu Industria Timor-Leste partisipa workshop ne’ebé organiza hosi Centro Internacional da Formação OIT (Organisação Internacional do Trabalho) iha Cabo Verde durante loron lima.

Workshop ho tema “Programa Ativu Merkadu Traballu no Orientasaun Profisionál nasaun CPLP” hahú loron 22 to’o 26 maiu 2017.

“Vantajén hosi workshop ne’e maka hetan kuñesimentu kona-ba prátika di’ak no polítika no estratéjia hodi halo orientasaun profisionál ba grupu vulnerável sira, nune’e bele hatene merkadu traballu ne’ebé eziste”, Diretór Informasaun Merkadu Traballu SEPFOPE, Jenifer António D. C. Pui ba TATOLI via email hosi Cabo-Verde, sesta ne’e.


Nia dehan, en-felizmente, Timor-Leste iha ona sistema orientasaun profisionál liuhusi workshop atu bele kontribui hodi hadi’a no hakle’an di’ak liu-tan sistema ne’ebé iha tiha ona.

“Atualmente iha ita rai seidauk eziste indústria barak, entaun alternativa maka orienta sira (grupu vulnerável) atu bele asesu ba empregu ativu hanesan emprendedorizmu, empregu ativu iha indústria ne´ebé ezisti no empregu exteriór tuir situasaun iha ita nia rai”, dehan.

Partisipante hosi Timor-Leste  ba workshop ne´e maka Jacinto Barros Gusmão, Diretór Jerál ba Jestaun no Planeamentu SEPFOPE, Aniceto Leto Soro, Inspetur Jerál Traballu SEPFOPE, João Alves hosi CCI TL (Câmara Comércio Indústria Timor-Leste), José da Conceição hosi KSTL no diretór Jenifer rasik.

Jornalista: Xisto Freitas | Editora: Rita Almeida

Foto: Diretór Informasaun Merkadu Traballu SEPFOPE, Jenifer António D. C. Pui, bainhira fó formasaun kona-ba merkadu traballu ba grupu vulnerável sira iha SEPFOPE, foin lalais. Imajen dok. Diretór Jenifer.

Sem comentários: