terça-feira, 23 de maio de 2017

ONU haree "ho ksolok no orgullu" ba Timor-Leste

Xefe gabinete hosi sekretáriu-jeral ONU nian, Maria Luiza Ribeiro Viotti, hatete iha loron-sesta katak "hanesan ho ksolok no orgullu maka ONU haree ba Timor-Leste no ba konkista sira povu timoroan nian".

"ONU iha ligasaun metin tebes ba akontesimentu ne'e. Iha dalan naruk ba independénsia, iha prosesu negosial, iha preparasaun no to'o eleisaun sira no iha apoiu ba konstrusaun hosi Estadu demokrátiku foun", explika hosi diplomata brazileira iha komunikadu.

Viotti partisipa iha loron-sábadu ne'e iha serimónia, iha Díli, ne'ebé selebra tinan 15 independénsia nasaun nian, hodi reprezenta ONU.

"Ho ksolok tebes maka ha'u partisipa iha selebrasaun ba restaurasaun independénsia Timor-Leste nian hodi reprezenta Sekretáriu-Jeral ONU nian, António Guterres", nia hatete no hatutan katak portugés senti "besik tebes ho Timor-Leste no hakarak marka prezensa" iha serimónia sira.

"Bainhira kaer knaar nu'udar primeiru-ministru Portugal nian, iha ona knaar desizivu ida iha akontesimentu sira ne'ebé lori to'o restaurasaun independénsia nian. No hanesan ho ksolok tebes haree Timor, iha 2002, fila fali ba moris independente no ba konvíviu hosi Nasaun sira", diplomata ne'e hanoin hikas.

Responsável temi mós Sérgio Vieira de Mello, funsionáriu ONU brazileiru nian ne'ebé mate iha 2003, hamutuk ho ema na'in 21 sira seluk, iha atentadu bombista ida iha sede ONU nian iha Bagdade, Irake, no ne'ebé atua nu'udar negosiador durante prosesu independénsia Timor-Leste nian.

"Ikusmai, ha'u hakarak hanoin hikas knaar hosi ha'u nia kompatriota, Sérgio Vieira de Mello, ne'ebé nia kompromisu no asaun kontribui maka'as ba konstrusaun Timor-Leste nian no ba nia integrasaun tomak ba komunidade internasional", Maria Luiza Ribeiro Viotti hanoin hikas.

Komemorasaun sira ba tinan 15 hosi restaurasaun independénsia timoroan nian, iha loron-sesta kalan no loron-sábadu madrugada, destaka mós ho serimónia simu pose ba Prezidente eleitu, Francisco Guterres Lu-Olo.

SAPO TL ho Lusa | Foto@ António Dasiparu /EPA

Sem comentários: