PM RUI ARAÚJO: TRIBUNAL REKURSU PREOKUPA EZEKUSAUN OJE 2014-2015

Primeiru Ministru (PM), Rui Maria de Araujo hatete katak, rekomendasaun Tribunal Rekursu (TR), la kestiona legalidade ezekusaun Orsamentu Jeral Estadu (OJE) tinan 2014 no 2015 nian, maibe preokupa liu kona ba kualidade ezekusaun.

Montante Orsamentu Jeral Estadu 2014 $ 1.5 biliaun no 2015 $ 1.5 biliaun, ne’ebe tinan-tinan Parlamentu Nasional lori povu nia naran autoriza atu instituisaun Estadu sira hotu utiliza ba dezenvolviementu sosio ekonomiku  Timor-Leste nian.

“Tribunal ba Kontas la kestiona, maibe hatudu liu preokupasaun konaba kumprimentu tekniku husi norma sira ne’ebe iha, liu-liu iha área orsamentasaun, ezekusaun despezas, aprovizionamentu no kontabilizasaun ka relatoriu ba kontas,” hatete PM Rui Araújo, iha diskursu wainhira debate Konta Jeral Orsamentu Estadu ba tinan 2014 ho 2015, iha uma Fukun Parlamentu Nasional (PN), Segunda (17/04).

Xefi Governu ne’e esplika katak, kaer tuir kompetensia atu halo eskrutiniu ka fiskalizasaun juridisional, relasiona ho konta jeral Estadu tinan 2014, Tribunal Rekursu hato’o rekomendasaun 24 no hato’o pareser  iha loron 10 fulan Dezembru 2015.

“Haree ba buat  ne’ebe temi iha relatoriu laran, maske ho rezerva balun relasiona ho in obserbvansia balun ba prinsipiu orsamentu nian, ajustamentu ne’ebe hala’o no haree ba observasaun no rekomendasaun ne’ebe halo ona, Tribunal Rekursu hakotu katak prestasaun kona ba fundu konsolidade Timor-Leste, fundu infrastrutura no fundu dezenvolvimentu kapital humanu ba tinan 2014 validu ona, halo tuir ona prinsipius konstitusionais, legais no regulamentares no Tribunal Rekursu hanoin katak konta jeral Estadu ida ne’e iha kondisaun atu Parlamentu Nasional bele aprova”, Rui Araújo haktuir.

Nune’e mos tenik Xefi Governu ne’e, relasiona ho tinan 2015, Tribunal Rekursu hafoin ejerse ninia kompetensia konstitusional atu halo eskrutiniu ka fiskalizasaun juridisional iha loron 15 Dezembru 2016, hato’o rokomendasaun 52), hafoin hato’o pareser hanesn ho ida ne’ebe konta jeral Estadu 2014 katak prestasaun konta fundu konsolidadu, infrastrutura, dezenvolvimentu kapital humanu ba tinan 2015 validu ona, halo tuir ona prinsipius konstitusional, legais no regulamentares nune’e TK hanoin katak konta jeral Estadu ida ne’e iha ona kondisaun atu Parlamentu Nasional bele aprova.

Ho ida ne’e, Rui Araújo hatutan katak, PN liu husi komisaun C PN nian ne’ebé trata ba asuntu Ekonomia no Finansas halo apresiasaun ba orsamentu 2014 nian iha 18 Fevereiru 2016 no halo pareser ho rekomendasaun sia (9) ba Governu.

Nune’e mós tenik Rui Araújo ba tinan 2015, iha loron 22 Fevereiru 2017, Komisaun C halo rekomendasaun walu (8), ba Governu no konsidera katak plenaria bele ona halo debate no votasaun.

PM Rui haklaken liu tan katak, dadus ezekusaun OJE 2014-2016, hatudu momos katak buat lubuk ida mak Governu hala’o ona hanesan, asinatura ba kontratu orsamentu kategoria ben i serbisus, kapital menor no kapital dezenvolimentu maioria ka besik 50 %, akontese iha terseiru no kuartu trimestre.

Alende ne’e, tenik Rui Araújo, ajustamentu ka transferensia interna ka virement iha instituisaun hotu hotu maioria ka entre 30 to’o 40% akontese iha terseiru no kuartu trimestre.

“Ida ne’e akontese tanba ita nia orsamentu ne’e periodicidade annual deit, la’os plurianual. Wainhira montante orsamentu iha kategoria ida la konsege utiliza hotu no wainhira la halo transferensia ba kategoria ka ba item seluk, tuir nesesidade instituisaun nian, to’o tinan nia rohan, orsamentu sei fila ba kofre estadu. Ida ne’e bele refleta kapasidade planeamentu ka kapasidade atu antisipa husi instituisaun ida-idak”, Rui Araújo esplika.

Razaun seluk maka, Rui Araújo esplika tan, ezekusaun ka despeza ka pagamentu cash  montante bo’ot liu entre 40-50% iha instituisaun hotu hotu akontese iha kuartu trimestre.

“Ida ne’e akontese tanba para alende orsamentu la’os plurianual, kontabildiade ho baze ba kaixa ka cash basis/modified cash basis accounting la permiti halo pagamentu, wainhira to’o ona tinan fiscal nia rohan, maski kontratu asina ona no sasan ka serbisu ka obra iha hela prosesu finalizasaun. Tanba limitasaun ida ne’e mosu dívidas não financeiras, pagamentos precipitados no pagamentos indevidos ne’ebe komisaun C observa iha relatóriu pareser ba tinan 2015”, Rui Araújo fundamenta.

Ho ida ne’e Xefi Governu ne’e fundamenta tan katak, presiza akomoda konteudu rekomendasaun hirak ne’ebe mai husi Tribunal Kontas no Parlamentu Nasional, liu husi revizaun ba politika atual iha sistema jestaun finansas publikas liu-liu komponente despeza hanesan parte husi reforma fiskal ne’ebe hala’o hela dadaun, VI Governu hahu  introduz iha tinan 2015, elementu balun husi orsamentu ba programas iha instituisaun 25 no sei kontinua iha 2017, hodi kompleta tan instituisaun besik 40.

VI Governu mos hahu hala’o ona konsulta ho peritus internasional, instituisaun Estadu nian, inklui komisaun C iha PN, sosiedade sivil, akademia no parseria dezenvolvimentu sira hodi prepara retiru ida ba orsamentu ba programa ne’ebe Konselhu Ministrus aprova tiha ona liu husi rezulusaun ida, hodi sai guia ba reforma sistematiku hirak ne’ebe sei ajuda lori Timor-Leste ba orsamentasaun, ezekusaun no responsabilizasaun orsamentu Estadu ho kualidade ne’ebe di’ak liu.des

Jornal Nacional Diário

Lee liu iha Timor Agora

XANANA GUSMAO, KONTA JERAL ESTADU 2014-2015 LAIHA VIOLASAUN