Timor-Leste
halo hela diálogu regular ho autoridade súl-koreanu sira no hanesan medida
kontinjénsia nian prontu hela hodi hasai traballador timoroan na'in 2.000 resin
bainhira tensaun iha península koreanu obriga, hatete hosi xefe diplomasia
timoroan nian.
"Agora
daudaun laiha alerta ida hodi bele foti medida sira hanesan hasai traballador
sira. Ami akompaña hela asuntu", hatete hosi ministru Negósiu Estranjeiru,
Hernâni Coelho, iha konferénsia imprensa iha Díli iha loron-segunda ne'e.
"Medida
sira ne'ebé ami iha atu hala'o maka medida jeral sira ne'ebé aplika ba sidadaun
estranjeiru sira iha nasaun. Ami iha medida kontinjénsia nian ne'ebé ami sei
implementa bainhira presiza. Maibé seidauk to'o iha pontu ruma nesesidade
nian", nia refere.
Iha
Koreia-Súl agora daudaun iha traballador timoroan na'in 2.000 resin, destaka
iha área atividade oioin, hosi peska to'o hortikultura, florikultura no
manufatura nian.
Traballador
sira serbisu iha Koreia-Súl ho baze hosi akordu ida entre governu rua no iha
ámbitu hosi programa bilateral ida ne'ebé halo hosi Ministériu hosi nasaun rua
ne'ebé kaer pasta sira traballu no empregu nian.
Tuir
nível global, iha traballador hamutuk rihun 50 resin hosi nasaun oioin sudeste
aziátiku nian maka serbisu iha Koreia-Súl ho baze hosi programa ida ne'ebé
koñese ho naran "Employment Permit System" (EPS).
Tensaun
iha península koreanu hamosu debate balun iha Timor-Leste hanesan preokupasaun
kona-ba traballador timoroan sira iha nasaun.
Prezensa
hosi traballador sira hanesan importante tebes ba sira nia família tanba sira
nia osan sai hanesan fonte prinsipal hosi rendimentu ba família barak nian.
Informasaun
hosi Sekretária Estadu ba Polítika Formasaun Profisional nian no Empregu
(SEPFOPE) hatudu katak iha de'it tinan liubá imigrante sira haruka ona ba
Timor-Leste osan hamutuk dolar millaun hitu resin.
SAPO
TL ho Lusa
Sem comentários:
Enviar um comentário