segunda-feira, 20 de março de 2017

Tarde, Eleitór Sentru Votasaun Faról Labele Vota

PARTILHAR
DILI, (ANTIL) – Triste no lamenta, ida ne’e mak sai hosi ibun inan feton nain tolu ne’ebé labele ezerse sira nian direitu hodi vota tanba tarde to’o sentru votasaun Eskola Basica No 1 Faról, suku Motael, Postu Administrativu Dom Aleixo, Autoridade Munisipál Dili.

Joana Marques, nu’udar médiku iha Hospitál Nasionál Guido Valadares to’o iha sentru votasaun liu minutu lima. Maske halo negosiasaun, ofisiál Sekretariadu Téknika Administrasaun Eleitorál (STAE) la-autoriza atu vota tanba regulamentu oras nian liu ona.

“Buat hotu ne’ebé ami halo iha ne’e tuir lei no regulamentu, tanba mana nain tolu ohin mai tarde, entaun konsekuénsia labele vota, lei mak ne’e ona, ami labele halo buat ida”, Vitor Hugo Maia Lopes hanesan ofisiál STAE ba ANTIL.

Joana Marques esplika, mai tarde tanba foin mak sai servisu hosi nia kna’ar fatin iha HNGV. “Ha’u foin mai hosi servisu, mai to’o iha ne’e taka ona, ha’u lamenta, tanba lakon ha’u nia votu”, lamenta.

Direitór Jerál STAE, Acilino Miranda Braco hateten, tuir orariu votasaun hahú tuku 7 dadersan to’o tuku 15.00 loraik.

“Sentru votasaun hot-hotu taka iha tuku 15.00 loraik, liu ida ne’e labele. Exeptu, iha fatin sentru votasaun ida ema sei iha liña, entaun ofisiál ida mak sei bolu nia hodi ba vota no hamrik kedan iha nia kotuk, liu tiha liña ne’e, laiha tan ema mak hamrik iha ofisiál nia kotuk”, Acilino esplika ba ANTIL, Segunda, (20/3) iha sede STAE, Kaikoli.

HNGV inklui médiku no pasiente, nomós dadur sira iha komarka hetan direitu liuhosi votu ambulante. (Jornalista: Gantry Meilana - Editora: Rita Almeida)

Foto: Ofisiál STAE. Foto STAE
PARTILHAR

Author: verified_user

Publicação luso-timorense sem fins lucrativos

0 comentários: