segunda-feira, 20 de março de 2017

Situasaun Teritoriu La’o Hakmatek

PARTILHAR
DILI, (ANTIL) – Komandante Jerál Polísia Nasionál Timor-Leste (PNTL), Komisáriu Júlio da Costa Hornay, informa, situasaun atuál iha teritoriu Timor la’o normál ho antusiasmu hosi votante sira.

“Ita espera situasaun ida ne’e la’o to’o remata, situasaun iha munisípiu la’o hakmatek”, Hornay hatete ohin dader.

“Hanesan komandante jerál ne’ebé responsabiliza ba seguransa atu hato’o ba komunidade tomak atu vota ho konsénsia rasik katak,  rai ne’e ita nian, ita hotu-hotu iha dever no hanoin atu asegura estabilidade”, apela.

Sé mak atu ukun, prezidente ba povu tomak. Tanba ne’e, ema ida-idak ho ninia direitu atu vota, maibé, importante mak kontribui ba pás no estabilidade, katak tan.

Konstribuisaun ida ne’e, oinsá atu hatudu ba mundu katak, mesmu Nasaun ne’e foin ukun-án maibé, ho maturidade polítika hodi asegura estabilidade seguransa ba povu no Nasaun. Nune’e, ita hotu hakmatek hodi haree rezultadu saida mak sei akontese, realsa. (Jornalista: Manuel Pinto - Editora: Rita Almeida)

Foto: Situasaun sira iha sentru votasaun Tuana-Laran. Foto ANTIL/Egas Cristovão
PARTILHAR

Author: verified_user

Publicação luso-timorense sem fins lucrativos

0 comentários: