segunda-feira, 20 de março de 2017

Lu-Olo: Laiha Segunda Ronde

PARTILHAR
DILI (ANTIL) – Uza faru mutin ho riska azul akompaña hosi nia espousa, kandidatu Presidenti Republika, Francisco Guterres “Lu-Olo” to’o iha fatin sentru votasaun Eskola Básico Faról hamutuk ho Sekretáriu Jerál FRETILIN, Mari Alkatiri hakat kedan ba estasaun numeru ida hodi fo nia votu  iha eleisaun prezidensial, Kuarta (20/03/2017).

“Laiha tan segunda ronde” komentáriu Lu-Olo ho fiar an sei manan iha eleisaun prezidensial periode ne’e hafoin kompete dala rua antes maibe sempre lakon iha segunda ronde.

Iha eleisaun ida ne’e, nia mos sente kontenti tanba povu bele halibur malu tan iha eleisaun presidensial hodi ezerse sira nia diretu polítika hodi bele hili nia Prezidenti Republika foun.

Hatan ba notisias media Australia nian, Lu-Olo ne’ebé hetan apoiu makas hosi eis Prezidenti Xanana Gusmão ne’e esklarese iha nia intervista nia esplika katak kona ba kadoras Tasi Timor, nia nudar sidadaun fo nia apoiu tomak ba pozisaun governu nian.

“Hau nia opiniaun hau dehan ba nia dada ba Timor ga husik iha tasi laran ga ba Darwin, buat ne’e hotu sei tau iha meza negosisasaun futuru mai entre Timor-Leste ho Australia,” hateten Lu-Olo.

Hafoin vota, Lu-Olo hamutuk ho nia esposa Cidalia Lopes Guterres konversa badak ho Mari Alkatiri ho nia oan no nia espousa hodi hatudu hikas nia liman fuan ne’ebe vota ona. (Jornalista: Gantry Meilana / Editor: Orlando da Conceicao)

Foto: Kandidatu Prezidenti Republika numeru 2, Francisco Guterres "Lu-Olo" hamutuk ho nia espouza, Cidalia Lopes Guterres hatudu liman fuan ba jornalista hafoin vota. Photo: ANTIL / Antonio Goncalves
PARTILHAR

Author: verified_user

Publicação luso-timorense sem fins lucrativos

0 comentários: