LIDERES LABELE INSULTA MALU IHA KAMPAÑA

Deputado sira iha Parlamento Nasional, Tersa (7/3) apela ba lider sira atu iha tempo kampaña eleitoral labele hasai lia fuan ladiak hodi insulta malu.

Natalino dos Santos, deputado bankada CNRT, deklara, iha tempu kampaña eleitoral, lider sira labele hasai liafuan ladiak hodi insulta malu  nune’e povu bele fo konfiansa hodi sai nu’udar Prezidenti Repúblika.

“Ha’u fiar katak objetivu kampaña ne’e atu gaña konfiansa husi povu entaun saida mak sira lori ba povu, sira lori sira-nia programa, sira-nia vizaun no misaun, agora se  iha palku kampaña mak lideransa balu hasai liafuan maka’as, insulta malu  la tuir ne’e  povu lalika fo fiar, lalika fo konfiansa ba lideransa sira hanesan ne’e. Karik iha ema ida rua mak halo hanesan ne’e maibe balun ne’e lori sira-nia programa diak tebes. Tanba ne’e importante lideransa sira labele insulta malu para povu bele fiar fo konfiansa,”esplika Deputadu Natalino dos santos ba JN-Diário iha PN Tersa (7/3/17), relasiona ho lider politika nasaun ne’e nian balun hasai liafuan insulta malu bainhira hahú kampaña eleisaun prezidensial periodu 2017-2022.

Tuir Deputadu Natalino nia observasaun durante ne’e katak, iha tempu kampaña kandidatu Prezidenti Republika balu ba koalia fali konaba programa Governu nian, maibe sira la koalia kona ba programa PR nian.

“Kampaña mos iha kandidatu balu la koalia programa Xefi Estadu nian, maibe sira koalia fali programa Governu nian, sira ba koalia hotu ne’e problema boot sira ba la koalia konaba oinsa atu kria estabilidade nasional, Prezidenti da Republika oinsa atu garante implementasaun lei didiak, oinsa atu garante konstitusaun,”dehan nia.

Iha oportunidade ne’e deputadu Natalino apela ba kandidatu PR sira  atu halo kampaña  labele ho lian maka’as ba malu, diak liu koalia programa vizaun, misaun PR atu lori povu no Estadu  hodi garantia estabilidade iha rai laran.

Entretantu deputadu husi bankada Partidu Demokratiku (PD), Adriano do Nascimento relata, kompetisaun politika kandidatu ida- idak nian tenki tau nia a’an nu’udar Timor oan.

“Ha’u hanoin ita sai Prezidenti ba ema hotu, la’os prezidenti ba ema sira ne’ebé ba vota deit ne’ebé importente mak ne’e kandidatu sira lori nia apoiantes sira tenki koloka linguazen ne’ebé atu halibur malu. Tanba ne’e husu ba kandidatu sira labele provoka malu hodi trata malu ho liafuan a’at. Se kandidatu ida mak trata malu aban bainrua sai prezidenti oinsa garantia estabilidade nasaun ninian,”dehan Adriano.

Iha parte seluk, Deputadu David Dias Ximenes husi bankada FRETILIN tuir nia observasaun katak, durante tempu kampaña iha lideransa balun  kritika malu, maibe sira la insulta malu.

“Ha’u hanoin durante kampaña ema krítika malu iha, maibe insulta malu laiha. Insulta malu ne’e so hasai lia foer ida hanesan sindir- sindir malu ne’e normal iha Politika, mas ha’u mos konkorda ho ita boot. Ita ne’e kiikoan, terus, tanis hamutuk hela diferensia  opiniaun politika deferenti ne’e wajar agora dinamiza ita-nia demokrasia mas lalika hatun malu karik diak. Ne’ebé ha’u nudar Deputadu, ha’u nia hanoin ita koalia deferensia para ita hamutuk hadia, maibe krítika malu la’os atu insulta malu, diskuti bele, mas la’os atu istoria malu,”David dehan.Car

Jornal Nacional Diário