Kontribuisaun Mídia Importante Iha Prosesu Eleisaun

DILI, (ANTIL) – Diretór Jerál Sekretariadu Tékniku Administrasaun Eleitorál (STAE), Acilino Manuel Branco dehan, kontribuisaun mídia importante iha prosesu eleisaun, tantu eleisaun suku nomos eleisaun lejislativa.

“Prosesu eleisaun ne’ebé lao iha ita nia rai, mesmu órgaun eleitorál tantu CNE no STAE ne’ebé hanesan órgaun tékniku implementasaun no supervizaun ba prosesu hotu, maibé atividade hotu inklui mós mídia, atu bele organiza ita nia papél ba eleisaun”, Acilino ba jornalista sira iha salaun enkontru STAE, Sesta, (17/3) durante breafing ho jornalista sira kona-ba papél mídia ba eleisaun prezidente.

Nia dehan, involvimentu mídia iha prosesu atinji progresu ne’ebé mak boot, liu-liu iha tasa partisipasaun hosi eleitór sira, hahú husi prosesu resensiamentu iha eleisoens, kompara ho nasaun seluk, mesmu sira nia eleisaun obrigatóriu maibé ita nia eleisaun ho konsiénsia, kompara ho persentajen boot.

Lei ne’ebé foin dadauk hetan alterasaun husi Parlamentu Nasionál, ikus regula prosedimentu tékniku no fó nafatin kompeténsia ba STAE hanesan órgaun tékniku ne’ebé bele fó akreditasaun ba observadór nasionál no internasionál, fiskais kandidatura partidu polítiku sira inklui fó kompeténsia atu halo akreditasaun ba mídia nasionál no internasionál.

Hodi katak tan, oras ne’e dadaun tuir dadus husi rejistu katak iha interese boot tebes mídia nasionál no internasionál ne’ebé hakarak halo kobertura ba prosesu eleisaun ne’e.

“Até ohin sei iha kontaktu husi maluk mídia sira husi liur, ne’ebé hakarak halo kobertura maibé regra komunikasaun no prosedidentu tékniku presiza preense tanba ko’alia kona-ba mídia iha dekretu mak regula”, tenik. (Jornalista: Julia Chatarina - Editora: Rita Almeida)

Foto: Sekretariadu Tékniku Administrasaun Eleitorál (STAE) no Konsellu Imprensa (KI) iha salaun STAE, Sesta, (17/3) organiza breafing ba midia sira kona-ba eleisaun prezidente. Foto ANTIL/António Goncalves