sábado, 25 de março de 2017

Konfiansa Povu Ba PNTL Pozitivu

DILI — Bispu Dioseze Baucau, Dom Basilio do Nascimento konsidera iha indikasaun diak relasaun povu ho Polisia Nasional Timor Leste (PNTL). Tanba konfiansa povu bainstituisaun nee boot tebes.

Hau rona ministru dehan halo inkeritu ida konaba kriasaun publiku, iha tempu ida 25% depois sae ba 60%, 70%, ohin loron sae ba 80%, nee relasaun ida pozitivu tebes intermus konfiansa populasaun nian ba polisia,” dehan Dom Basilio ba Jornalista hafoin halo reflesaun ho estrutura PNTL tomak iha Centru Formasaun Polisia (CFP) Comoro Dili, Sesta (24/03/2017).

Dom Basilio hatutan hanesan nasaun foun iha esforsu lubuk ida, maibe sei kuran los, tan nee iha tinan 15 instituisaun nee sei buka hadia  aan. “Hau laiha dadus maibe hau hanoin too oras nee ita hanoin katak ita nasaun foun, needuni esforsu lubuk ida sei kuran los duni, maibe tinan 15 instituisaun sira sei hadia sira nia aan, hau hanoin neineik-neneik instituisaun koko hadia  aan,” tenik Dom Basilio.

Nia hatutan bainhira hahu ona buat hotu la perfeitu, maibe buka atu kompleta, needuni labele haree deit husi parte  lorosae nian, pelumenus too oras nee efetivus sei uituan, meus  ladun barak, luron sira  laiha fasilidade.

PNTL Halo   Reflesaun

Atu Komemora aniversariu   instituisaun  Polisia Nasional Timor-Leste (PNTL) ba dala XVIIneebe monu iha loron 27 fulan Marsu, komandu PNTL realiza misa retiru hamutuk ho membru PNTL husi munisipiu hotu. Retiru nee prezide husi Bispu Dioseze Baucau, Dom Basilio do Nascimento.

Iha reflesaun nee Dom Basilio  dehan hanesan sarani sira neebe servi uma kreda servisu nasaun atu hanoin mos hanesan sarani iha tempu ida nee atu bele moris tuir mensajen kuarema nian no espiritu kuaresma nian ba sira nia vida hanesan sarani.

Ohin hau dehan ba sira katak, hanesan polisia hau lahatene buat ida, maibe hanesan sarani servisu no knar ida nee los duni bainhira sira fo onra ida mai hau, hau simu ho laran mai fahe lian fuan Maromak nian ba sira iha tempu ida nee,” dehan Dom Basilio ba Jornalista sira iha CFP Comoro Sesta (24/03/2017).

Dom Basilio akresenta hanesan sarani ida-idak tuir nia falan iha  fatin hanesan, ida-idak tuir nia objetivu ida-idak tuir nia meus liu-liu polisia hanesan sarani buat neebe husu ba sira nee sira servisu ho lei no ordem. “Hau repete fali polisia hanesan  sarani needuni buat neebe husu ba sira nee servi ho lei ho ordem,” relata Dom Basilio.

Maske nunee sira neebe serviho prespetiva hanesan sarani nia fiar, hanesan ema neebe servisu ba estadu sira iha sira nia fatin propriu, sira iha sira nia prospetiva propriu hodi servi nasaun, servi sidadaun tuir estatutu polisia nian.Maibe naroman neebe polisia  simu, naroman ida nee mai husi buat neebe lei haruka neebe mai mos husi konsiensia Maromak nian.

Iha sorin seluk Ministru Interior, Longuinhos Monteiro dehan, retiru ida nee atu halo reflesaun ba komandu munisipiu sira nia valores neebe adopta ho servisu hotu neebe mak halo iha vida polisial nian.

Refleksaun ida nee importante tebes tanba nee mak ami bolu funsionariu tomak no mos diretor jeral no funisionariu liu-liu ita nia reflesaun atu hakbesik malu, maibe atu konkreta konsiensia kona ba dezisaun neebe mak atu foti iha vida pesoal no mos iha vida profesionalismu hanesan servidor estadu nian,” dehan Longuinhos.

Retiru nee partisipa mos komandante munisipiu husi munisipiu 13, inklui mos dirasaun imigrasaun bomberu no mos estudante  sira balu. Retiru nee taka ho misa neebe prezide husi Bispu Diosese Baucau, Dom Basilio do Nascimento.

Iha homilia Dom Basilio dehan hanesan sarani hadomi Maromak liu sasan hotu no hadomi ema seluk hanesan  aan rasik.

Lia fuan rua nee sai sasukat ita sarani sira nia hahalok, Jesus Kristu  iha lalehan hanesan sasukat atu sukat se ita nee Maromak nia oan ka lae, ita nain Jesus Kristu hanorin hadomi Maromak liu sasan hotu hadomi ema seluk hanesan o nia aan  rasik, hafoin prinsipiu rua nee mak hanoin dezenvolve ita haree hanesan, se hadomi Maromak, maibe hau la fiar se hau hadomi Maromak hau la halo hahalok neebe tuir ukun fuan haruka,” dehan Dom Basilio liu husi homilia.

Alende nee Komandante Jeral PNTL, Komisariu Polisia Julio da Costa Hornay dehan, aniversariu Polisia Nasional Timor Leste (PNTL) sei iha promosaun diviza ba antigudade ajente nain 9, e husi postu diviza  ajente prinsipal ba ajente xefe. Lucia Ximenes

Suara Timor Lorosae

Sem comentários: