Atividades
investimentu ne’ebe kompanha lubuk ida halo iha mota Comoro nia laran to’o
agora seidauk hetan lisensa ambiental husi Diresaun Nasional Ambiente,
Ministeriu Comersio, Industria no Ambiente (MCIA).
Kompanha
hirak ne’e iha lesensa operasional legalmente ne’ebe registu iha SERVE, maibe
la iha lisensa ambiental atu esplora riku soi notureza iha mota Comoro laran.
Tanba tuir lei katak, kualker esplorasaun ne’ebe ninia afeta ba ambiente tenki
iha estudu ambiental ne’ebe hetan lisensa husi Diresaun Nasional Ambiente no
hetan mos lisensa husi Autoridade Nasional Petroleo no Minerais (ANPM) nudar
orgaun Estadu ne’ebe kontrola ba potensia mota laran, rai maran ho tasi laran.
Diretor Nasional Ambiente, Antonio Lelo Tasi, klarifika katak, kompanha lubuk
ida mak halo sira nia atividades kee rai henek iha mota Comoro nian.
Kompanha hirak ne’e monta nia nia ekipamentus pezadus no industria nian
iha mota laran hodi esplora potensia rai henek no fatuk iha mota laran, maibe
to’o agora seidak trata lisensa ambiental no seidauk hetan lisensa ambiental.
“Ami
halo ona notifikasaun ba kompanha sira ne’e no husu atu hapara sira nia
atividades tanba bele prezodika ambiente, maibe kompanha sira ne’e la tau
atensaun,” informa Diretor Nasional Ambiente, Antonio Lelo Tasi, wainhira dada
lia ho JNDiario iha Dili, Kuarta (29/3/2017).
Atu
regula atividades sira iha mota laran, Antonio Lelo Tasi esplika katak,
Autoridade Nacional Petroleo e Minarais (ANPM) mak iha kompetensia
administrativu, tanba ne’e, Diresaun Nasional Ambiente halo ona komunikasaun ho
ANPM hodi trata kestaun ne’e no buka solusaun hamutuk ba problema iha mota
Comoro.
“Iha
Tersa (28/3/2017), ami ho ANPM ba ona halo levantamentu iha terrenu no ami
haree atividades iha mota laran ne’e fo perigu tebes ba komunidade sira
wainhira tempu udan boot, tanba ne’e, ita buka atu halo prevensaun lalais,”
hateten Antonio Lelo Tasi.
Husi
parte ANPM nian to’o agora seidauk bele fo sai nia esklaresimentu kona-ba
proeblema ne’e tanba informasaun ne’ebe iha katak, autoridades sira ANPM nian
sei kontinua halo levantamentu no rekolha informasaun molok fo sai ba publiku
iha tmepu badak nia laran.
Investimentu
ne’ebe kompanha sira halo iha mota laran no mota ninian Comoro nian bele fo
perigu b komunidade sira ne’ebe hela besik iha mota ibun, tanba tempu udan boot
bee mota la bele hala ituir nia dalan tanba kompnaha sira halo esplorasaun hodi
taka hotu bee dalan.
Udan
boot iha Domingu (26/3/2017), hamosu dezastre ba komunidade Lisbutak ho
Bee Duku ne’ebe hela besik iha mota ninin, tanba bee mota konsege sobu duni
moru protesaun no lori uma 2 besik ponte Comoro III. Alem ne’e, kondisaun
alkatraun iha Estrada area neba naksobu total impaktu husi udan ne’ebe
sobu moru protesaun.
Inisiu
kedas, wainhira kompanha sira halo mobilizasaun monta ninia ekipamentus iha
mota laran, komunidade sira halo protesta ona, tanba komunidade sira preokupa
kuandu ke’e bei-beik mota ne’e maka udan boot halo mota sei sobu moru protesaun
sira no sobu mos ambiente iha mota ninian.
Komunidade
sira husi Lisbutak, Suku Bairopite, Dili ho komunidade balun Bee Duku,
Liquiça, fo sasin katak, wainhira sira halo protesta hasoru empreza sira
ne’ebe halo atividades iha mota laran, maibe autoridade Polisia Nacional Timor
Leste (PNTL) sempre halo intervensaun. Komunidade hatene momos katak,
investimentu ne’e sei la fo benefisiu no lori impkatu la diak ba sira iha
tempu udan boot mota tuun.
Komunidade
fo rajaun katak, wainhira kompanha sira mota nia ekipamentus pezadus iha mota
laran, autormatikamente taka ona bee dalan hodi halo bee mota sulin la
livremente ba tasi. Tanba ne’e, wainhira bee boot mosu mai
tendensiu buka dalan seluk. Ironia liu, kompanha ne’e taka tiha bee dalan no
kee fali fatin seluk liu tiha fali profunidade moru protesaun ne’ebe halo iha
mota ninin.
Informasaun
ne’ebe iha katak, iha fulan hirak liu ba Ministeriu Obras Publiku, Transportes
no Komuniksoens (MOPTK) haruka karta xamamentu ba kompanha balun atu hapara lai
atividades iha mota laran tanba bele lori perigu iha tempu udan boot.
Ministru
Obras Publiku, Transportes no Komunikasoens (MOPTK), Gastão de Sousa, Segunda
loraik (27/3/2017), halo kedas observasaun direita ba moru protesaun ho Estrada
hirak ne’ebe naksobu no at ne’ebe rezulta husi udan boot, foin lalais ne’e.
Ministru
Gastão propoin atu halo investigasaun no levantamentu ida kle’an kona-ba tansa
mak udan bele sobu moru portesaun ho Estrada iha area Bee Duku nian. Nia
haree katak, bee mota sobu moru protesaun ho Estrada tanba empreza balun
maka halo instalasaun makin trend ne’ebe halo terik tiha bee dalan, maibe tenke
iha investigasaun.mia
Jornal
Nacional Diário
Sem comentários:
Enviar um comentário