CNE : Impede Propaganda Eleitorál Sei Hetan Pena Prizaun

DILI, (ANTIL) –Prezidente Comissão Nacional das Eleições (CNE), Alcino de Araújo Barris hatete, ema ne’ebé impede kandidatura prezidente repúblika atu halo propaganda eleitorál sei hetan pena prizaun to’o tinan 2 ka multa.

“Ema ne’ebé destroi ilejitima ba seluk ne’ebé ezerse direitu atu halo kampaña eleitorál sei hetan kastigu tinan 2 ka multa, bazeia ba kódigu penál artigu 233.2”, Prezidente CNE ba jornalista sira liuhosi konferénsia imprensa iha sentru mídia CNE, Kaikoli, Segunda (6/3).

CNE apela ba kandidatu sira ne’ebé sente afetadu ba direitu kampaña eleitorál  bele hato’o keixa mai CNE atu bele partilla ba ministériu públiku ba kualker krime eleitorál ne’ebé iha koñesimentu.

Kampaña eleitorál mak atividade direta ka indireta hodi promove kandidatu liuhosi materiál propaganda. Kandidatu sira designa responsavél ba kampaña eleitorál molok kampaña hahú. Responsavél sira nia kna’ar mak garante kumprimentu ba regulamentu no mós asegura kontaktu ho autoridade eleitorál, sívil no polísia.

Periódu kampaña eleitorál ba kandidatu prezidente repúblika loron 15, hahú 3 Marsu to’o 17 Marsu. Atividade bele hahú hosi tuku 8 dader to’o tuku 18:30.

Durante kampaña bandu atu utiliza lian sira kontra instituisaun estadu sira no unidade RDTL, insitadór violénsia, defamasaun no seluk tan.

Periódu kampaña, kandidatu sira labele oferese gratifikasaun ka promesa rekompensa ba eleitor sira, la dirije ameasa represalias, la intimida eleitór no la utiliza kareta estadu atu halo kampaña.

Kampaña eleitorál hala’o ho distansia ne’ebé la-interompe funsionamentu servisu iha sede orgaun soberania, rezidénsia ofisiál titulár, orgaun soberania, instalasaun militár sira hanesan Polísia Nasionál Timor-Leste (PNTL), prizaun, edifísiu relijiozu, embaixadór no konsuladu sira, sede partidu polítiku, sede CNE no STAE, portu sira, aeroportu, instalasaun telekomunikasaun, sentrál eletrónika, fatin abastesimentu bee nian, kombustivél no materiál sira ne’ebé fasíl lakan. (jornalista: Zezito Silva; editora: Rita Almeida)

Foto: Prezidente CNE, Alcino Barris. Foto ANTIL/Zezito Silva