sábado, 11 de fevereiro de 2017

Nasaun Presiza Ema Ne’ebé Kompriende Estadu

PARTILHAR
DILI, (ANTIL) – Prezidenti Partidu Kongresu Nasionál Rekonstrusaun Timor (CNRT), Kay-Rala Xanana Gusmão hateten, kandidatu Prezidenti Repúblika periodu 2017 to’o 2022 Francisco Guterres Lu-Olo nu’udar ema ne’ebé kumpriende  estadu.

“Timor presiza ema ne’ebé túr iha leten ás ne’ebé kompriende Estadu, sintidu Estadu, hatene nia obrigasaun konstitusionál, hatene nia obrigasaun ba liur no hatene nia obrigasaun ba povu,” Xanana hato’o kestaun ne’e iha lansamentu sede Kampaña Kandidatu Lú-Olo iha Aimutin, Komoro, Dili, Sesta (10/2).

Nia dehan, Lú-Olo iha kuiñesementu oinsá lidera nasaun tanba iha eperiénsia sai Prezidenti Asembleia Konstituante iha 2001 hodi hakerek Konstituisaun Repúblika, sai Prezidenti Parlamentu Nasionál iha periodu 2002 to’o 2007 no lisensiadu iha área direitu.

Iha biban ne’e, kandidatu Lú-Olo hatete katak bainhira nia eleitu kumpri de’it Konstituisaun, serbisu hamutuk ho Parlamentu, Governu no órgaun sira seluk, promove diálogu ho partidu sira ne’ebé laiha asentu iha Parlamentu Nasionál no prense kadeira parlamentu.

Nia dehan, bele iha demokrasia ne’e to’o oinsá maibé só timoroan hamutuk maka bele lori nasaun ba oin.

“Ha’u senti onradu teb-tebes tanba ha’u la la’o mesak. Ha’u moris hosi Maun-Boot Xanana ho sira seluk nia kabaas leten no sira eduka ha’u para hadomi Estadu ida ne’e,” Lu-Olo katak.

Nia promete, nia sei hamriik iha ninia fatin hodi halo konsensu ho Governu no Parlamentu ba povu nia interese maibé la’ós interese partidária ninian.

Partisipa iha seremónia lansamentu sede kampaña nian ne’e maka Prezidenti Partidu CNRT ho ninia estrutura maka hanesan Francisco Kalbuadi Lay, Veneranda Lemos, Dulce de Jesus Soares, Bilou Mali no mós estrutura partidu FRETILIN ho nia militante, simpatizante sira no veteranu sira. (jornalista: Xisto Freitas; editora: Rita Almeida)

Foto: Prezidenti Partidu Prezidenti Partidu CNRT, Kay-Rala Xanana Gusmão kaer liman ho Sekretáriu Jerál Partidu FRETILIN, Marí Alkatiri no kandidatu Lú-Olo ho nia espoza iha seremónia lansamentu sede kampaña Kandidatu Lú-Olo iha Aimutin, Comoro, Dili, Sesta (10/2). Foto ANTIL/Xisto Freitas
PARTILHAR

Author: verified_user

Publicação luso-timorense sem fins lucrativos

0 comentários: