LH LA KONTENTI XANANA HAKUAK WIRANTO

Organização Não Governamental (ONG) Lao Hamutuk la kontenti ho aktu Ministru Planeamentu no Investementu Estratéjiku (MPIE), Kay Rala Xanana Gusmão, nian foin lalais ne’e ba hakuak Ministru Defeza Indonesia, Wiranto, tanba Wiranto nia kazu kona ba Timor Leste la’o hela iha Tribunal Internasionál.

Reprezentante ONG La’o Hamutuk, Celestino Gusmão, kestiona katak,  kona ba krime pasadu, liu-liu iha tempu funu to’o 1999, Timor oan barak sofre no barak mate.

“Ha’u nia hanoin, se Ita bo’ot eleitu sai Prezidenti Repúblika, intervensaun saida mak ita bele hakotu impunidade sira ne’e, liu-liu ita nian relasaun ho Indonesia. Oras ne’e dada’uk, ita foin hatene katak, Ministru Xanana Gusmão hasoru malu ho Wiranto, ema ne’ebé nia akuzasaun seidauk hotu  husi painel especial ba krime graves ba Wiranto la mate. Tanba saida mak ita nia lider bo’ot sira ba hakuak malu, hamnasa. Ne’e mai ha’u, karik ne’e hanesan insulta ida ba povu Timor Leste, ba terus naruk ne’ebé Xanana Gusmão mós hola parte, no ita bo’ot rasik mós hola parte,”lamenta Celestino Gusmão, ba kandidatu PR, Francisco Guterres ‘Lu-Olo’, baihira Lu-Olo hasoru malu ho sira iha FONGTIL Caicoli-Dili, Kinta (23/02).

Tanba ne’e, Celestino husu kuandu Lu-Olo sai Prezidenti Repúblika karik, pozisaun saida mak nia bele koloka ba situasaun ida ne’e.

“Ita bo’ot (Lu-Olo) hatene katak, Governante sira husi Australia mai husi sosiedade ida ne’ebé kaan ten, hakarak apodera direitu sira hotu ne’ebé la’os partensia ba sira nian. Ita fiar katak, fronteira maritima ne’ebé tuir ita nian hakarak iha median line ne’e. oinsa ita nia intervensaun bainhira sai Prezidenti Repúblika,”husu Celestino.

Nia mós dehan, povu Timor Leste tomak hatene katak, oras ne’e dada’uk Estadu Timor Leste iha batalla ida kona ba fronteira maritima ho Australia.

Nia haktuir, oinsa mak Estadu nia responsabilidade ba vítima funu nian,  atu halo kompensasaun ka oinsa, tanba kuandu Estadu halo kompensasaun, sira seluk ne’ebé mak mate, Estadu tenki fó hotu kompensasaun ba sira. Maibé Estadu sei fó rekoñesimentu ida ba sira hodi foti fali sira nian oin hanesan sidadaun.

Hatan ba preokupasaun ne’e, kandidatu Prezidente Repúblika, periodu 2017-2022, Francisco Guterres ‘Lu-Olo’, hatete, polítika Timor Leste nian kona ba relasaun di’ak ho nasaun seluk ne’e, di’ak tebes, justisa no krime, tau iha nia fatin.

“Kona ba hakuak Wiranto ne’e,  ha’u seida’uk ba hakuak dala ida, imi nia avo Xanana mak ba hakuak. Maibé Wiranto iha akuzasaun ida kona ba nia ne’ebé se prevanese nafatin. Nia kandadatu dala ida ona ba Prezidenti Repúblika, mas nia lakon, agora nia sai fali Ministru Defeza Indonesia nian,”dehan Lu-Olo.

Prezidenti partidu FRETILIN ne’e dehan, problema Timor Leste nian ne’e mak, oinsa atu lori Wiranto ba Tribunal Internasionál, tanba Wiranto mós assume kargu importante ida iha Indonesia.cos

Jornal Nacional Diário