Primeiru
Ministru (PM), Rui Maria de Araújo, iha Kinta (9/2) horseik, iha Centro
Convenções Dili, hatete katak, Governu sei la tolerá ema nebe hakarak halo
violénsia durante eleisaun jeral.
“Governu
nu’udar instituisaun Estadu ne’ebé hetan mandatu konstitusional konaba
aplikasaun operasional husi monopóliu ba uza violénsia hakarak afirma katak,
sei la iha toleránsia ba sé deit maka hakarak ka rekore ba violénsia direta ka
indireta, malorek ka subar-subar atu subverte ka atu influensia prosesu no
rezultadu eleisaun ninian,” hatete PM Rui iha semináriu, ho tema, “Papel
Sidadaun Nian Iha Dezenvolvimentu Bem-estar ho nia sub tema, Paz Justisa No
Toleransia Hodi Bele Konsolida Independensia Nasional”, ne’ebé organiza husi
Gabineti Apoiu Konjuje iha Prezidenti Repúlika ninian, iha Centro Convenções de
Díli (CCD), Kinta (09/02).
Rui
hatete, seminariu ida ne’e relevante tebes ho kalendáriu polítika demokratiku
Timor-Leste iha tinan 2017.
“Haree
husi perspetiva alteransia demokratika ne’ebé la fo dalan ba ezersisiu poder
politika, iha orgaun Estadu ho forma Vitalisia, maske pensaun bele vitalisia,
ita nu’udar órgaun soberanu konsolida ita nia independensia nasional liu husi
eleisoens regulares, hodi ita nia lider sira ne’ebé sei kaer ukun iha órgaun
soberanu tolu, Prezidensia, Parlamentu Nasional no Governu. Tinan ida ne’e, ita
sei hala’o prosesu demokratiku ba konsolidasaun independensia nasional ida ne’e
iha fulan Marsu no Jullu,” PM Rui hatete.
Xefi
Governu ne’e akresenta, ambiente toleránsia, estabilidade no paz iha
prosesu eleitoral tomak sei akontese, sei depende ba lideres lideres Partidus
Polítikus (PARPOL), nia konsensia atu eduka nia militantes no simpatizantes
sira.
“Primeiru,
violénsia no instabilidade la mosu, se la iha ema ruma instiga ka insita ka
halo mosu, wainhira lideres no militante sira hala’o loloos knar atu desimina
defende sira nia programa no buka konvense eleitor sira atu ba sira la obriga,
la manipula ka buka sosa ema nia votu. Simu ho laran luak rezultadu povu nia
desizaun iha eleisaun”, dehan Rui Araújo.
“Segundu
sei depende ba rigór, integridade no imparsialidade iha órgaun eleitorál sira,
STAE iha tarefa imporante ida atu hala’o prosesu eleisaun ho rigór no
imparsialidade tomak no CNE iha misaun lulik atu garante katak prosesu eleisaun
tomak iha integridade no la fasilita fali ema ida ka partidu ida ka rua. No
terseiru sei mós depende kapasidade atu antisipa no neutraliza risku ka ameasa
ba seguransa no ordem públika iha instituisaun Estadu ne’ebé responsável atu
garante ordem, seguransa no defeza hanesan PNTL ho F-FDTL”, tenik Rui Araújo.
Tanba
tuir Xefi Governu ne’e katak, instituisaun rua ne’e mós tenki firme no isentu
labele haliis ba ema ida ne’e, ka ida ne’ebá ka ba partidu ida ne’e ka ba
partidu ida ne’ebá.
PM
Rui dehan tan, iha Estadu modernu hotu-hotu paz no estabilidade maka sai pillar
imporante ba dezenvolimentu. Prosesu harii Estadu Timor-Leste iha tinan 15 nia
laran ne’ebé liu ona, hatudu duni katak violensia ho instabilidade ne’ebé
mosu iha tinan 2002, 2004, 2006 no 2008 sai obstákulu bo’ot ba prosesu
dezenvolvimentu iha rai ida ne’e.
Rui
de Araújo dehan tan katak, TL agora dadauk tama hela iha prosesu harii, entaun
fó hanoin mós katak tuir matenek nain Max Weber hateten, iha Estadu modernu
hotu-hotu, Estadu deit maka iha “Monopoliu ba uza Violensia” signifika Estadu
maka bele uza forsa hodi impoin ordem no hapara violénsia entre sidadaun sira.
“Maibé
ita ohin halibur malu iha ne’e la’os atu koalia konaba oinsa instituisaun
Estadu sira, iha área seguransa no defeza bele uza sira nia monopoliu ba
violénsia, maibé atu reflete hamutuk oinsa sidadaun sira, liu-liu sidadaun sira
ne’ebé sai militante ka halibur iha partidu polítiku sira no sidadaun
sira ne’ebé pleneia atu konkore iha eleisaun tinan ida ne’e bele kontribui ba
ambiente toleránsia, estabilidade no paz nu’udar fator ne’ebé kontribui ba
kredibilidade prosesu eleisaun tomak no mós fator importante ba dezenzolvimentu
nasaun nian,” PM Rui esplika.des
Jornal
Nacional
Sem comentários:
Enviar um comentário