ANGELA FREITAS SEI SUPORTA SAUDE INAN NO OAN

Atu inan sira bele kria kondisaun ne’ebé seguru no saúdavel hodi transmiti nutrisaun ne’ebé diak ba ninia oan sira, kandidatu Prezidente Repúblika ho númeru neen, Angela Freitas iha ninia master plan sei tau atensaun máximu ba saúde inan no oan ninian.

“Ha’u hanoin tenki fó atensaun boot ba area saúde. Kria kondisaun ne’ebé diak, atu inan sira bele kria kondisaun hodi haree ninia oan sira iha situasaun sira hanesan malnutrisaun no menus susu been. Tanba hau hare fornesimentu husi HNGV foka liu ba edukasaun sivika oinsa maka inan sira ne’e fila ba uma no oinsa maka sira bele prepara an ho nutrisaun fornese ba ninia oan sira,” dehan kandidatu PR, Angela Freitas ba jornalista sira hafoin remata vizita sala pediatria (labarik-red) no malnutrisaun ninian iha Hospital Nacional Guido Valadares (HNGV), Kinta (23-02-2017).

Hanesan inan ida ne’ebé maka hamriik nuudar kandidatu Prezidente haree katak importante teb-tebes oinsa maka bele promove diak liu tan ema ninia saúde, atu bele kria no fó mós direitu ida ne’ebé inan ne’e bele hetan.

“Iha planu ne’ebé ha’u trasa, inan isin rua sei hetan bonus para bele fasilita sira, ajuda sira atu nune’e sira bele krese sira nia oan ho diak”, informa nia.

Nia relata mós katak ninia vizita ba HNGV ne’e hakarak haree funsionamentu HNGV ninian, liu-liu tratamentu médikus ba pasiente sira iha sala pediatria ou labarik ninian no iha sala inan sira hahoris prematur ninian.

“Ho situsaun ida ne’e ha’u hanoin maioria labarik sira ne’e ho moras ne’ebé hanesan, ida ne’e rejulta husi ita nia situasaun ambiente ne’ebé la saúdavel, presija mós atu bele iha definisaun ba programa Estadu ninian, atu nune’e bele defini konabá fatin industria, komersiu no mós rezidensia, tanba ita haree katak iha ita nia rai ne’e konstrusaun sira ne’e kahur malu de’it, to’o ikus rejulta polusaun ne’ebé laduun saúdavel, halo ita nia oan sira maka sai vítima,” tenik kandidatu PR númeru 6.

Tuir Xefi Gabineti Kontrolu Kualidade no Komunikasaun Sosial-HNGV, Paulina Pinto informa, nuudar sidadaun ida, Angela Freitas iha direitu tomak atu halo vizita iha fatin ne’ebé de’it, inklui mós HNGV hanesan fatin públiku ninian, nune’e kandidatu PR hotu-hotu iha direitu atu vizita no haree kondisaun ne’ebé maka HNGV iha, hodi mensiona iha sira nia programa ruma wainhira sira kompete iha eleisaun prezidensial 2017.

“Ohin (23/2) ninia fokus utama ne’e nia atu haree ba malnutrisaun ninian no mós pediatria ninian, entaun nia dehan iha fleksibilidade ka la’e ba inan isin rua sira ne’ebé maka atu fó susu ba bebe, maibé inan nia sus been la to’o, karik nia iha hanoin ida oinsa maka planu ba oin karik inan ida maka ninia susu been barak, nia bele fahe mós ba inan sira seluk ne’ebé maka presija,” dehan Paulina Pinto.

HNGV fo edukasaun sivika

Nia hatutan HNGV sempre halo edukasaun sivika ba inan ho oan sira ne’ebé maka kategoria malnutirsaun antes alta husi HNGV.

“Ita nia HNGV ne’e hanesan mós parte ida atu fahe informasaun ba familia pasiente sira, liu-liu ba inan sira ne’ebé maka ho ninia oan sira ho diagnosa ida dehan katak malnutrisi, iha parte ida ne’e HNGV rasik iha ninia ema nutrisista sira ne’ebé maka kelola ona ba hahan ne’ebé maka fornese ona ba sira durante sira iha HNGV.

Nia esplika katak, nutrisita HNGV sira ne’e loro-loron sira sempre eduka inan ho oan sira ne’ebé maka ho kazu malnutrisaun, oinsa maka karik alta husi HNGV hahan saida maka diak atu fornese ba ninia oan sira iha future, hanesan produtu lokal sira ne’ebé maka ho nutrisaun diak ba saúde inan no oan ninian.

“Durante ne’e ami nia ekipa husi nutrisista sira ne’ebé que oferese hahan ba HNGV, tantu ema boot, tantu ema kiik ami iha ona dieta sira ne’ebé maka iha tiha ona ninia kalkulasaun husi siensia ne’ebé maka ami ida-idak hetan,” dehan Paulina. Ves

Jornal Nacional Diário

LEE MÓS IHA JORNAL NACIONAL DIÁRIO