sexta-feira, 20 de janeiro de 2017

Donald Trump ohin simu pose iha Washington

Multimilionáriu Donald Trump, ho tinann 70, iha ohin simu pose liuhosi  serimónia públika iha Kapitóliu, Washington, sai hanesan ema  ida ne’ebé katuas liu assume Prezidénsiál  Estadus Unidus.

Iha  meiudia (oras lokál) Washington nian, Trump sei presta juramentu hanesan prezidente Estadus Unidus badala 45.º , ho atensaun hosi ema ne’ebé hafahe entre apoiante no tauk hosi krítiku sira.

Fonte ofisiál fó sai antes ona katak entre ema rihun 800 ba 900 sei iha Washington atu assiste serimónia ne’e, ho festeju assosiadu ka partisipa asaun protestu oioin  ne’ebé prevé ona.

Serimónia ne’e assume kontrolu hosi kapitál federal ho kondisionamentu maka’as ba sirkulasaun ba ema, kareta no transporte públiku. Ho kolokasaun ba elementu forsa seguransa besik 28.000.

Iha  kinta-feira feira, porta-vós ida hosi  Prezidente eleitu afirma katak diskursu inaugurasaun Donald Trump sei "pessoál" no "filozófiku".

"Sei iha deit deklarasaun pessoál ida no  sinseiru kona-ba ninia vizaun ba nasaun", hatete Sean Spicer, no hatutan katak rezidente Casa Branca nian sei  aborda "saida maka  signifika sai amerikanu", dezafiu ne’ebé sei hasoru povu amerikanu, liliu ba klase média.

"Ha’u hanoin katak hanesan  testu ida ho menus ajenda polítika no filozófiku liu, vizaun ne’ebé iha kona-ba nasaun, papel adekuadu governu nian, papel sidadaun nian", nia refere.

Fó sai moos kona-ba auzénsia kongressista demokrata barak  iha serimónia pose ne’e, ho ninia inísiu prevé ba oras 09:30 lokál nian.

Númeru ne’e hetan aumenta durante semana ne’e no, iha kinta-feira lorokraik, kongressista demokrata  liu  60 afirma ona katak planea ona atu  boikota serimónia ne’e, buat ida ne’ebé inéditu iha istória kontemporánea Estadus Unidus nian.

Konfirmadu ona ba serimónia ne’e prezensa tradisionál hosi eis-Prezidente no respetivu primeira-dama sira: Bill Clinton ho ninia kandidata democrata prezidensiál Hillary Clinton, antigk kazal prezidensiál George W. Bush no Laura Bush no Jimmy Carter ho ninia kaben Rosalynn.

Dadus ne’ebé fó sai iha loron hirak ikus ne’e hatudu katak  Trump hanesan Prezidente eleitu ladun  popular iha tinan 40 ikus ne’e, ho deit opiniaun favorável  40%.

SAPO TL ho Lusa

Sem comentários: