Suku mak Responsavel ba Prosesu Eleisaun Laos STAE

LAOS - Deputadu Arao Noe husi Bankada CNRT dehan eleisaun suku ba tinan ne'e responsabilidade iha kada suku laos STAE. 

DILI: Iha prosesu eleisaun ba lideransa komunitaria ne’ebé realiza iha loron 29 Outubru 2016 mosu kritika barak tanba konsidera iha failansu lubuk ida durante prosesu ne’e. Maibé, reprezentante povu iha Parlamentu Nasionál katak eleisaun ne’e atu la’o di’ak ka lae ne’e responsabilidade tomak iha suku idaidak nia liman.

Deputadu husi Bankada CNRT, Arão Noe hatete, eleisaun ba lider komunitaria la’os kompetensia Sekretariu Tekniku Administrasaun Eleitoral (STAE) nian, maibé, suku sira.

"Suku sira mak organiza eleisaun.ne'e. Husi STAE halo de'it supervizaun", katak Arão ba Olatimornews.com iha PN, Sesta (05/11).

Arão afirma, STAE hamutuk ho administradór postu, inklui administradór Konsellu sira sei fó de'it apoiu, inklui halo supervizaun ba prosesu eleisaun.

MAE Rekoñese Failansu

Entretantu, Ministériu Administrasaun Estatal (MAE) rekoñese mosu failansu iha eleisaun lideransa komunitaria. Maibé, sei iha dalan atu hadi’a hodi labele akontese tan iha segunda volta.

"Ami rekoñese iha falilansu. Ami sei hato'o ba leten problema hotu kona-ba eleisaun primeira volta nian," deklara Diretór Jeral Desentralizasaun Administrativu, Abilio José Caetano, Kinta (03/11).

Tuir Abilio, ekipa tekniku sira sei esforsa hodi hadia erru ne’ebé mosu.

"Ha'u fiar ita sei susesu iha eleisaun tuir mai," dehan Abilio. (*)

Ola Timor - Santa Fe Amado - Editór: Tellukoro - Foto: The Dili Weekly Newspaper