segunda-feira, 31 de outubro de 2016

Kandidatu Xefe Suku Becora Deskontente ho Eleisaun Suku


DILI, (ANTIL) - Kandidatu Xefe Suku Becora, João da Silva “Choque” deskontente ho eleisaun suku ne´ebé hala´o iha Aldeia Au-hun, Suku Becora, Postu Administrativu Kristu Rei, Munisípiu Dili, Sabadu (29/10).

Eleisaun ne’e, tuir João, la organizadu no kuaze laiha segredu. Partisipante la komportável, tendénsia hamosu manipulasaun tanba seguransa ba votasaun ne´e mukit teb-tebes no sosializasaun ba prosesu eleisaun ne’ebe la espalla ho di´ak,  halo kunfuzaun.

“Ha´u la konsege avansa ba segunda ronda, tanba votus la to´o. Komu ne´e povu nia desizaun, entaun ita tnki respeitu,” nia dehan ba ANTIL iha nia hela fatin, Becora, Segunda (31/10).

Nia hela ho votus 1,800 hosi totál eleitor hamutuk 7,000, ne´ebé partisipa iha eleisaun refere. Entretantu, kandidatu António da Silva, xefe suku antigu, manán ho votus 4,070 no votus nulu 1,000. Posibilidade boot sei laiha eleisaun segunda ronda.

Choque ladún satisfás ho xefe suku eleitu, tanba tenta utiliza poder lori obriga ema analfabetu (buta huruf) kontinua hili nia (António). Maske nune´e,  nia lakohi hato´o protestu ba hahalok hirak ne´e, tanba eleisaun hotu la´o tiha ona no la importante ona atu protesta. (Jornalista: Xisto Freitas/Editor : Otelio Ote)

Foto: Kandidatu Xefe Suku Becora, João da Silva

Sem comentários: