FOLIN MINA MUNDIÁL KOMESA SA’E

Ministru Petroleum Rekursu Minarais (MPRM), Alfredo Pires informa katak, folin mina iha merkadu internasionál komesa sa’e husi US$ 45-US$ 50 kada baril.

“Folin mina iha merkadu interansionál, agora sa’e fali ba US$ 45 to’o US$ 50 kada baril. Governu akompaiña hela ida ne’e, iha tempu ida nia tuun to’o US$ 30 i tal de’it, mas agora sa’e fali ona, i agora ba oin depende de’it situasaun no fatór ne’ebé determina,” informa Alfredo Pires ba jornalista sira iha Palácio Prezidénsia Repúblika Aitarak Laran Díli, Kuarta (28/09).

Alfredo Pires hatutan tan katak, kuandu iha mudansa ba folin mina hanesan ne’e, fó impaktu tebes, la’os ba Timor Leste (TL) de’it, maibé ba mundu tomak, li-liu nasaun sira ne’ebé moris ho mina.

“Entaun automatikamente, osan ne’ebé mai husi Bayu Undan mós, tenki menus ona,” katak Alfredo Pires.

Nia esklarese, folin mina ne’e, rai ki’ik oan sira hanesan Timor Leste, susar atu iha influensia ruma, husi internasionál mak bele determina ida ne’e.

Alfredo Pires esklarese, fatores husi mina tuun ne’e, iha hanoin balun dehan, agora mina komesa barak liu ona, no fatores lubuk ida seluk tan, maibé mina nia folin ne’e sei normal fali.

Alfredo Pires dehan, lei ne’ebé mak foin lalais Parlamentu Nasionál (PN) aprova tiha ona, kodigu mineiru nian, ne’ebé atu haree kona-ba osan mean, no magnesia.

ConocoPhillips hakarak tau fura tan mina

Iha okaziaun ne’e, Alfredo Pires mós reforsa katak, Kompañia ConocoPhillips ne’ebé oras ne’e dada’un explora hela mina iha Bayu Undan, husu ba Governu atu halo tan prefurasaun ba mina matan hat ka lima iha Bayu Undan, tanba mina matan ne’ebé mak oras ne’e dada’un ConocoPhillips explora ne’e, besik atu maran ona.

Tanba ne’e, Ministru Petroleum Rekursu Minarais (MPRM), Alfredo Pires informa katak, liu husi enkontru ho Prezidenti Repúblika, PR Taur Matan Ruak ne’e, MPRM no Autoridade Nasionál Petroleum (ANP) esplika kestaun ne’e mós kona-ba servisu MPRM ho ANP nian durante ne’e ba Xefi Estadu Taur Matan Ruak.

“Prezidenti mós hakarak hatene kona-ba explorasaun mina, li-liu mina matan Bayu Undan nian, ne’ebé ConocoPhillips husu atu halo profurasaun ba mina matan hat ka lima hanesan ne’e, entaun ami mai fó update, oinsa Governu halo avaliasaun ba ida ne’e,” informa Alfredo Pires.

Alfredo Pires hatutan katak, agora dada’un Governu sei halo hela avaliasaun kona-ba, atu konkorda ho ConocoPhillips nia hakarak ne’e ka la’e.

Alfredo Pires mós esklarese katak, pedidu ConocoPhillips nian ne’e, la signifika katak, tenki halo kedas, mas iha prosesu ida para halo evaluasaun.

“Ami mai ko’alia kona-ba prosesu mina nian ne’e no ko’alia mós kona-ba potensialidade sira seluk, i fó update kona-ba prosesu tasi mane nian,” Alfredo Pires esplika.

Iha oportunidade ne’e mós, Alfredo ho nia ekipa informa ba PR Taur Matan Ruak kona-ba, rezervas planu Governu nian, li-liu kona-ba atu dezenvolve projetu tasi mane oinsa.

Entretantu  Institutu Petrolojia mós informa ba Prezidenti Repúblika kona-ba, rikusoin Timor Leste (TL) nia seluk iha rai maran, hanesan mina rai no seluk tan.cos

Jornal Nacional