RISKA ‘BURADU” BANDEIRA RDTL, PN HUSU PNTL HALO KAPTURASAUN

Reprezentante povu iha Parlamentu Nasional (PN) kondena maka’as hahalok grupu juventude balun ne’ebe hakerek ‘buradu’ bandeira RDTL.

PN mos husu ba autoridade seguransa, liu-liu Polisia Nacional Timor Leste (PNTL) atu halo kapturasaun urjentimente ba ema hirak ne’ebe ho vontade hakarek ‘buradu’ bandeira RDTL ne’ebe sai mos simbolu sagradu nasaun no povu Timor Leste nian.

Membru PN husi Bankada FRETILIN, Manuel Castro, ho Deputadu Manuel Guterres husi Bankada CNRT, inklui Xefi Bankada CNRT, Natalino dos Santos, lamenta tebes tanba hahalok ne’e la valoriza simbolu nasaun nian, ne’ebe maka povu rihun ba rihun sosa ho rui, ran no isin lolon.

Deputadu Manuel Castro, Deputadu Manuel Guterres ho Deputadu Natalino dos Santos, sublinha katak, aktu hakerek ‘buradu’ bandeira RDTL ne’e krime tanba ne’e Polisia Nasional Timor Leste (PNTL) bele foti ona medidas ruma.

“Bandeira ne’e laos hena ne’ebe ita suku bai-bain, mas bandeira ida ne’e ita lori ruin ho ran. Ema rihun ba rihun tenki mate hodi hetan bandeira ida ne’e, tanba ne’e,  husu ba Timor oan hotu atu respeita bandeira ida ne’e,” afirma Deputadu Manuel Castro ba JNDiario iha PN, Tersa (02/08/2016).

Ho lian maka’as Deputadu Manuel Castro lia tun dehan,  hahalok ema ne’ebe hakerek ‘buradu’ bandeira RDTL, dala ruma, laos nasionalista.

“Se lakohi  ona iha Timor bele sai husi Timor, husu mos ba ema estranjeirus atu respeita bandeira ne’e,” afirma Manuel Castro.

“Hau husu ba Polisia atu toma kedas medida, halo kapturasaun no halo investigasaun ba ema nebe halo Bandeira hanesan ne’e, ida ne’e ita hatun dignidade nasaun nian, la respeita nasaun no simbolu nasaun nian,” afirma Manuel Castro.

Deputadu Manuel Guterres via mensanjen facebook afirma katak, bandeira RDTL ne’e sagradu nudfar simbolu nasaun, tanba sosa ho ruin no ran ne’ebe oras ne’e barak sei naklekar hela iha teritoriu Timor laran tomak.

“Husu Komando PNTL bele foti ona medidas ruma tanba ida ne’e ita konsidera krime kontra Estadu RDTL,” afirma Deputadu Manuel Guterres.

Husi sorin seluk, prezidenti bankda CNRT, Natalino dos Santos hateten,  ema ne’ebe halo hahalok ne’e la iha sentidu Nasionalisme ba nasaun.

“Hena ne’e sira hanoin dehan katak hena simples ida maibe hena ida ne’e nia signifikandu boot no sagradu teb – tebes, ita hare katak povu ida ne’e mate tanba defende rai ida ne’e no Bandeira ida ne’e, Bandeira nudar simbolu de representante do povu ida ne’e que sofre tinan ba tinan hodi hari Bandeira ne’e,” afirma Deputadu Natalino iha PN.

Deputadu Natalino hateten, se Timor oan ida maka hakerek Bandeira hanesan ne’e, hahalok ne’e tristi tebes i organizasaun ne’ebe halo buat ne’e atu bolu atensaun i sei bele halo investigasaun tamba sa tenki hakerek iha Bandeira ne’e.

“Sira nia hahalok ne’e hanesan pelecehan ba Bandeira ne’ebe lori ruin no ran i balu lahetan to’o agora hodi hamrik, mais konsege hari Bandeira ne’e iha rai ida ne’e, ida ne’e sira halo pelecehan ba simbolu nasional no bele konseidera hanesan krime,” esplika Natalino dos Santos.

Deputadu ne’e mos husu ba Polisia atu foti medidas forte ba asaun ne’e tamba pelecehan ba simbolu nasional, hahalok ne’e la tolera iha nasaun ne’e tamba Bandeira ne’e simbolu povu ida ne’e nian, simbolu nasaun soberanu nian.

Jornalista JN-Diário halo esforsu ona hodi hetan konfirmasaun ba grupu juventude ne’e iha sira nia sede, maibe sede refere nia odamatan savi metin no laiha pesoal ida mak hein.nes/mia

Jornal Nacional