PrezidentI Partidu FRETILIN, Francisco
Guterres ‘Lu-Olo’ hatete katak, nia ho Mari Alkatiri maka ai-rin metin partidu
FRETILIN nian.
“Ami lakaer riku soin povu maubere nian,
maibe tan saida mak soe fali rai rahun mai ami nia ulun fatuk leten, imi mak
kaer no imi mak ukun, ami respeita imi nia ukun, mas ami sala saida mak hodi
rai rahun tula mai ami nia leten, maibe ami hatene ona, tanba Lu-Olo no Mari
Alkatiri sei sai nafatin ai-rin ba uma lulik FRETILIN nian,”hateten PrezidentI
partidu FRETILIN, Lu-Olo iha kampanha eleisaun pakote uniku lideransa FRETILIN
iha Tasi tolu, Dili, Tersa (30/08/2016).
Lideransa másimu FRETILIN nian ne’e hatutan
tan katak, lideransa masimu FRETILIN nian liu husi kampanha hakarak hato’o ba
militantes sira katak sira militantes FRETILIN keta haluha ba vota iha loron 3
Setembro tuir mai hodi desidi loloos sira nia lideransa hodi nune’e ba ukun iha
tinan 2017.
“Ami nain rua mai hato’o ba imi
(red-militantes) katak ami nain rua sai pakote uniku ida ba lideransa FRETILIN
nian iha periodu 2016-2021, ami na’in rua sai pakote ida deit para imi bele
fihir iha loron 3 Setembro mai, ami hakarak atu hateten ba imi hotu katak ami
nia kabas husi karuk, husi los sai nu’udar ai-rin boot ida, nu’udar fatuk ida
hodi hari’i uma ka’in ida mak uma ka’in FRETILIN nian nafatin,” Lu-Olo
fundamenta.
Lu-Olo akresenta tan katak, uma ka’in ne’ebe
metin la’os sira nain rua (red-Lu Olo, Mari) deit, maibe sira mos rekonhese
lideransa FRETILIN sira seluk mos sei sai ai trabesaun hodi hari’i uma ka’in
FRETILIN ninian, atu bele lori halibur juventudi sira hamahon-an iha uma boot
FRETILIN nian, uma ka’in boot ida ne’e lulik, uma ka’in ida ne’e ho intensaun,
hanoin no hakarak di’ak atu bele halibur mos povu tomak iha uma mahon ida ne’e
nian.
“Uma mahon liu husi hanoin, liu husi
politika ida ne’ebe FRETILIN hakarak atu lori liberta ita nia rain no
liberta povu husi ki’ak no mukit, ne’e maka FRETILIN nia hakarak. Ami na’in rua
sai pakote uniku para atu garante demokrasia no lori demorasia atu servi
interese povu nian, tempu ida ne’ebe ami la’o ho FRETILIN ami hatene halo
reflesaun ba ami nia an, no reflesaun ba saida maka ukun rasik an,” sublinha
eis Prezidenti Parlamentu Nasional ne’e.
Iha fatin hanesan, Sekretariu Jeral
FRETILIN, Mari Alkatiri, dehan ho pakote uniku FRETILIN nian ho lideransa
masimu na’in rua ho objetivu ida katak to’o ona tempu FRETILIN fila fali ba
ukun iha tinan 2017.
“To’o ona tempu atu FRETILIN fila mai ukun
rai Timor Leste, atu kore povu husi kiak, mukit, no husi nakukun, tanba ne’e
maka prezidente Lu-Olo no hau rasik desidi dala ida tan kaer nafatin FRETILIN
nia kuda talin, atu lori FRETILIN ba vitoria,” dehan Mari Alkatiri.
Nune’e mos, membru Comite Central FRETILIN
(CCF), atual Primeiru Ministru (PM), Rui Maria de Araujo, ne’ebe partisipa mos
iha kampanha eleisaun lideransa partidu FRETILIN nian, husu mós ba militantes
FRETILIN tomak atu hotu-hotu parte iha eleisaun hodi vota ba Lu-Olo ho Marí.
“Iha loron 3 Setembro ita tenke ba vota
Lu-Olo no Mari, ita vota ho objetivu atu manan iha eleisaun tinan 2017,” dehan
Rui Maria de Araujo.
Entretantu, kampanha eleisaun lideransa
FRETILIN nian ne’e partisipa husi militantes Munisipiu Bobonaro, Ermera,
Liquiça, Aileu no Dili rasik, inklui mos Postu Administrativu Atauro.
Partisipa iha kampanha ne’e mai husi
Prezidenti FRETILIN, Francisco Guterres ‘L-Olo’ akompanha ho espoza, Sekjen
Mari Alkatiri, membru CCF, Organizasaun Mulher Popular Timor (OPMT), atual
Ministru Negosio Estranjeiros no Kooperasaun (MNEK), Hernani Colho, atual Primeiru
Ministru, Rui Maria de Araujo no militantes FRETILIN tomak husi munisipiu lima,
kampanha ne’e la’o ho susesu tanba hetan segutansa masimu husi PNTL.mia
Jornal Nacional
Sem comentários:
Enviar um comentário