quarta-feira, 31 de agosto de 2016

HORTA ASEITA ‘ZERO’ PENSAUN VITALISIA • HALAKON MOS PENSAUN BA EIS TITULARES


Eis Prezidente Republika nudar mos titulares, José Ramos Horta, konkorda atu halakon total pensaun vitalisia no halakon mos pensaun ba eis titulares sira.

“Hau konkorda tenke hatun tiha pensaun vitalisia, hau hateten kleur tiha ona, pensaun vitalisia nune’e moralmente hau hanoin la diak, ema serbisu tinan hat deit, balun nein serbisu, laiha kompetensia ida, nudar deputado, membru Governu simu pensaun ba vida tomak, ne’e injustu, se sira hakarak hahu kedas eis titulares, hanesan hau, maske hau servi Estado liu husi tinan hat mais bele hatun ba hotu uo halakon kedas mos diak tan,” afirma Laureado Nobel da Paz 1996, Jose Ramos Horta, wainhira responde Jornalista iha Dili, Sesta (26/08/2016).

Horta mensiona tan tak, se serbisu tinan 4 deit maka hetan ona pensaun vitalisia iha vida tomak ne’e lajustu. Nia konkorda hasia totalmente pensaun vitalisia, inkluindu hasai hotu pensaun ba eis titulares sira.

Horta konsidera pensaun vitalisia hamosu injustisa, tanba funsionario, doutor iha hospital, professores serbisu durante vida tomak para hetan pensaun ida, sira serbisu tinan nen nulu no hat nulu mak foin bele hetan pensaun mais ki’ik koan, mais tanba sa mak deputado no membru Governu sira serbisu tinan hat deit hetan pensaun vitalisia.

Antes ne’e Prezidente Republika, Taur Matan Ruak mos husu atu halakon total pensaun vitalisia, kuandu lahalokon maka lei pensaun vitalisia ne’ebe mak PN aprova haruka ba iha nia sei la promulga.

Oras ne’e dadauk a PN kria ona komisaun eventual ida hodi debate atu halo revizaum ba lei refere. Komisaun eventual hatama ona pareser ba iha meja Prezidente PN, Aderito Hugo da Costa no tau ona iha ajenda atu iha Segunda (19/09/2016), sei debate iha plenaria. mia

Jornal Nacional

Sem comentários: