terça-feira, 2 de agosto de 2016

Governu Propoin Falur Rate Laek Kontinua Ba Xefe Estadu-Maior F-FDTL


Díli - (ANTIL) – Governu liu husi desizaun Konsellu Ministru, tersa-feira (02/08/16), aprova proposta rekondusaun ba atuál Xefe Estadu-Maior Forsa Armadas F-FDTL, Koronel Domingos Raul, alias Falur Rate Laek, hodi asumi nafatin kargu nu’udar Xefe Estadu Maior F-FDTL ba periodu ida tan.

Proposta foun ne’e hato’o husi Ministru Defesa Cerilio Cristovão, bazeia ba Dekretu-Lei númeru 7/2014 ne’ebé altera tia ona ho Dekretu-lei númeru 28/2016 loron 28 de Jullu. Tuir Ministru Cerilo Cristovão, hafoin Konsellu Ministru halo apresiasaun no aprova proposta rekondusaun ne’e, Governu sei haruka fali ba Prezidente Republika hodi foti disizaun.

Cerilio hatutan tan, Proposta rekondusaun ne’e, Governu sei haruka ba Prezidente Repúblika, hodi hetan aprovasaun, hafoin sorumutu Konsellu Seguransa ho Defesa.

Koronel Falur Rate Laek, asumi tiha ona kargu nu’udar Xefe Estadu-Maior F-FDTL ba periodu dala rua ona, no remata tiha ona iha fulan hirak liuba. Maibe haree ba experensia no kapasidade, institusaun F-FDTL sei persija hodi prepara jerasaun foun balun hodi lidera Forsas Armadas iha futuru, tanba ne’e mak Governu propoin atu extende tan ba periodu ida. Informa Cerilo.

Tuir Ministru Cerilio, Bazeia ba proposta rekondusaun ida ne’e Mandatu Xefe Estadu-Maior sei remata iha tinan 2017 hanesan ho kargu ba Xefe Estado-Maior General F-FDTL, Major Jeneral Lere Anang Timur.

Iha Parte seluk aleinde proposta rekondusaun ba kargu Xefe Estadu Maior, Falur Rate Laek, Konsellu Ministru konkorda mos nomeasaun ba Komandante komponente iha forca armadas ne’ebé mai husi Xefe Estadu Maior General F-FDTL.

Ministru Cerilio Cristovão hatutan, Ofisiais ne’ebé asumi kargu iha komponentes Forsas Armadas nian hanesan, Komandante ba Komponente Forsa Terrestre, Tanente Coronel Marcelino Ximenes “Rizzai”, Komandante ba komponente Forsa Naval Ligeira, Kapitaun Fragata, Adão de Brito “Jacky”, Komandante ba komponente Formasaun ho Treinu, Tanente Koronel Celestino Pinto “ Daileba”, no Komandante ba komponente apoiu ho servisu asumi husi Tenente Coronel Benedito Dias Quintas “Punu Fanu”. Editor Otelio Ote

ANTIL

Sem comentários: