DILI,
(ANTIL)- Sentru Lojístika Nasionál
(SLN) halo ona verifikasaun dadus kona-ba kazu Sosiedade Agrikultór Timor-Leste
(SATL), ne’ebé fakar koto iha Palásiu Governu nia sorin.
Akontesimentu
ne’e iha dadeer, oras serbisu nian iha loron 28 Jullu 2016. Iha loron
ne’e kedas, Primeiru Ministru hatún despaixu ba iha Ministériu Komérsiu
Indústria no Ambiente (MKIA) atu haree kona-ba kestaun ne’e.
Nívio
Magalhães, Administradór Sentru Lojístika Nasionál, Ministériu Komersiu,
Industria no Ambiente hateten ba ANTIL ,segunda (29/8) iha Dili,
bazeia ba despaixu ne’e, SLN bolu SATL hodi halo enkontru para buka solusaun
hodi rezolve problema ne’e tuir lei. Nune’e iha loron 23 Jullu 2016 halo
enkontru ho SATL nia prezidente no nia estrutura sira iha Aileu.
“Ami
halo diskusaun lubuk ida kona-ba prosesu hotu no SATL hato’o katak sira lahetan
benefísiu husi agrikultór sira, maibé fasilita sira atu fa’an koto mai
governu”, Nívio relata.
Iha
enkontru ne’e, SLN informa sei lasimu koto sira ne’e, bainhira laiha kontratu
no tenke rezolve hamutuk. SLN hato’o mós ba sira atu organiza enkontru
ida ho agrikultór sira tanba, depois simu instrusaun hodi rezolve tuir lei
ne’ebé vigór, tenke buka hatene lista sira ne’ebé aprezenta ne’e válidu ka la’e
no membru ne’e iha duni ka la’e?
Rezultadu
enkontru ne’e, deside halo fali enkotru ida iha loron 25 Agostu 2016 iha
Fatubesi no Aitutu, atu erifika lista naran agrikultór no konsege hasoru membru
grupu sira.
“Iha
lista sira-ne’e, ami deskobre buat balun. Membru sira ne’ebé aprezenta iha
lista, barak mak hakerek ema nia naran de’it, maibé loloos ema ne’e ema laiha.
No númeru kuantidade koto ne’ebé agrikultór sira hatama, barak liu lista ne’ebé
aprezenta”, Nívio dehan.
Husi
verifikasaun ba lista naran no kuantidade koto ne’e, SLN sei hato’o relatóriu
ba ministru hodi aprezenta ba Primeiru-Ministru. (Jornalista : Maria
Auxiliadora/Editór: Otelio Ote)
Foto:
Palásiu Governu
Sem comentários:
Enviar um comentário