terça-feira, 29 de março de 2016

TESI DESTINU MEMBRU GOVERNU PD – PM RUI HEIN DESIZAUN FINAL CNRT

PARTILHAR

Primeiru Ministru (PM) Rui Maria de Araújo hateten katak, nia seida’uk bele foti desizaun ba membru Governu PD sira, tanba seida’uk iha konkluzaun final husi Partidu CNRT.

Xefi Governu ne’e konsidera desizaun partidu CNRT atu hapara ko’aligasaun ho PD ne’e hanesan prosesu polítika ida.

“Partidu sira ko’alia entre sira, kuandu iha ona konkluzaun final oinsa, sira hateten mai Xefi Governu, depois Xefi Governu sei foti desizaun,” informa PM Rui Araújo ba jornalista sira iha Palácio Prezidensial Aitarak Laran Dili, Kuarta (24/03), hafoin hasoru malu ho Prezidenti Repúblika Taur Matan Ruak.

Xefe Governu ne’e esklarese, agora dada’uk prosesu troka de impresaun polítika, dialogu entre partidu sira ne’e la’o hela nafatin, wainhira sira to’o iha konkluzaun ruma ona, depois sei hato’o ba Governu no hato’o ba Prezidenti Repúblika.

“Ha’u informa oituan ba Prezidenti, situasaun Governu ninian, hafoin iha semana hirak liu ba, ita rona iha konversas polítikas entre partidu sira ne’ebé forma koliagasaun, CNRT ho PD, hato’o ba Prezidenti katak, Governu mantein nafatin servisu hanesan bai-bain,” katak Rui Araújo.

Iha sorumutu ne’e mós, Governu ho Prezidenti Repúblika Taur Matan Ruak iha ona opsaun atu hakotu ezorasaun Jeneral F-FDTL.

Primeiru Ministru Rui Maria de Araújo informa katak, agora dada’uk Governu kontinua halo dialogu ho Prezidenti Repúblika atu buka solusaun ba problema ida ne’e.

“Agora ami se estuda hela, depois Prezidenti fila husi vizita mak ami sei haree, ita hein katak, iha temporariu ida ne’e, iha ona konkordansia entre Governu ho Prezidenti Repúblika kona-ba ida ne’e,” informa PM Rui Araújo.cos

Jornal Nacional
PARTILHAR

Author: verified_user

Publicação luso-timorense sem fins lucrativos

1 comentários:

Anónimo disse...

Iha kazu politika ida ne, ita hare klaru katak hanesan partidu politiku, PD laiha kredibilidade politika! Tamba, CNRT halo ona despedimentu politika, mais PD halo finge la hatene ou moe maka laiha duni!!,,,,,tuir lolos ne, iha momentu CNRT hakotu koligasaun, PD entrega kedas, ne maka dehan politisi bermoral,,,,agora ita hare hanesan pengemis politika!, kehilangan harga diri.......halo TL moe deit!!.....

PD hakarak halo politika labarik, mais lakoi simu konsekuensia politika, tan ne diakliu lalika buka justifikasaun oin'oin....hare aruma deit pasta no good bye....!!CNRT nia decizaun ne kolektivu.....CNRT laos unipesoal......purtanto,...presija tan linguajen oinsa atu klarifika decisaun nee......