LH LAMENTA UKUN NAIN LA TUIR DEMO

Luta Hamutuk (LH) lamenta ba ukun nain sira inklui emprezarius ne’ebe la tuir demonstrasaun kontra Governu Australia ba fronteira maritima foin lalais ne’e.

Diretor Luta Hamutuk (LH), Mericio Akara hatete, manifestasaun ne’e lolos laos povu no sosiedade sivil sira deit, maibe ukun nain, emprezariu sira mos tenki hamrik iha oin hotu hamutuk ho povu sira hodi halo asaun demostrasaun ne’e. Tanba aban bainrua osan mina nian ne’e, povu sira sei la uza, ukun nain sira, emprezario sira mak sei hetan benifisu maka’as.

“Ukun nain sira hetan pensaun vitalisia ho previlejio oin-oin no emprejario sira foin kaer projetu deit selu ona, ita nia fundu osan sira ne’e 95 mai husi ita nia mina ne’e, agora tempu hanesan ne’e estudante sira ho povu sira mak ba hakilar iha loro laran, aban bainrua osan iha povu sira sei la hetan benifisiu ne’e la justu,’’dehan Akara ba jornalista sira iha edifisu Luta Hamutuk Farol, Kuarta (23/03/2016).

Nia haktuir katak, demostrasaun ne’e mai husi vontade povu nian duni la iha ema ida mak obriga, maibe hanesan ukun nain no emprezario sira ne’ebe mak gasta osan Estadu nian barak liu lolos tenki hamutuk ho povu sira.

Iha fatin seluk, portavoz Movimentu Kontra Okupasaun Tasi Timor (MKOTT) Juvinal Dias deklara katak, ema balun senti sira liberta an ona, tanba simu ona kareta Prado ho pensaun vitalisia, maibe hanesan povu ne’ebe hakarak liberta 100% sei luta hela hodi hetan tan soberania ba tasi iha Timor Leste.

‘’Ita sira mai iha ne’e laos luta ba medalha ida luta ou ba pensaun vitalisia, maibe ita mai iha ne’e atu hatur ita nia dignidade hanesan povu iha nasaun ne’e hodi ejije ita nia direitu ba fronteira maritime,’’dehan Juvinal ba manifestante sira iha Jardim Bebora, Kuarta (23/03/2016).

Nia hatete, sira ne’ebe mak mai hamutuk halo manifestasaun ne’e loas atu halo festa, halo manifestasaun ne’e la hamrik iha ema ida nia kotuk, iha grupu balun nian kotuk ka iha partidu balun nia kotuk, sira mos ba iha ne’eba ne’e laos tan iha doit metan ida, maibe hanesan povu iha vontade rasik hakarak husu ba Australia halo negosiasaun ho povu Timor Leste hodi define lolos liña fronteira maritime entre Timor ho Australia.

‘’Dala ruma povu kiik sira ne’e mak ba halo manifestsaun hamrik iha oin, seluk mai dehan sira nia objetivu atinji ona, lolos ukun nain sira tenki sai ida hodi fo ezemplu ba povu sira hodi kontra Australia lolos ukun nain sira tenki unidade, labele ema ida mak organiza ema seluk mai desmoraliza vontade povu nian ne’e traisaun bainhira atu desmoraliza povu nian vontade hau trai imi nia vontade,’’ afirma Juvinal.

Nia mos esklarese katak, luta kontra Australia ba fronteira maritima ne’e la determina iha eleisaun 2017, maibe luta ne’e determina iha vontade povu nian atu kontinua nafatin ejije ba Australia hodi bele halo negosiasaun. nia

Jornal Nacional