terça-feira, 13 de outubro de 2015

Governu rekomenda atu halo renovasaun ba mandatu hosi xefe forsa defeza nian sira


Governu husu atu halo renovasaun ba mandate hosi xefe nomós visi-xefe Estadu Maiór Jenerál Forsa Defeza Timor-Leste (F-FDTL) nian ne’ebé asumi kargu desde 2011.

Rekomendasaun atu majór jenerál Lere Anan Timur (tito da Costa Critóvão) ho brigadeiru jenerál Filomeno da Paixão de Jesus asumi hikas kargu refere, durante reuniaun Konsellu Ministru ne’ebé hala’o horisehik, tuir ezekutivu fó sai ohin.

Lere Anan Timur simu pose ba ninia kargu iha 6-outubru-2011 hosi Prezidente Repúblika, José Ramos-Horta, ne’ebé Taur Matan Ruak troka ba, hafoin desidi atu fila ba vida sivil, hafoin hato’o aprezentasain ofisiál hosi ninia rezignasaun.

Taur Matan Ruak, ne’ebé hanesan komandante ikus hosi brasu armada rezisténsia timor-oan nian, Falintil, agora hanesan xefe Estadu Timór.

Iha 2011, alénde Lere Anan Timur nomós Filomeno de Jesus, promove mos Falur rate Laek, hanesan Xefe Estadu Maiór Forsa Armada nian.

Lere Anan timur ne’ebé ho idade 63, hosi Ilomar, distritu Lospalos, parte lorosa’e Timor-Leste niansai nu’udar militár portugés durante tinan ida, hahú hosi agostu 1974, depois maka sai nu’udar asistente polítika Falintil nian, ka hanesan brasu armada Fretilin.

Hanesan komadante destakamentu guerilla timor-oan nian desde 1979 no eleitu membru hosi komité sentrál Fretilin iha tinan 1981, no iha 1983 Lere asumi responsabilidade ba rejiaun Haksolok, ne’ebé abranje ba to’o iha Ainaro no Suai.

Hetan kanek durante kombate iha tinan 1984, nomeia ba komandante 4.ª Unidade iha 1985, no iha fali 1987 ho departidarizasaun hosi brasu armadu Fretilin nian, hodi hala’o funsaun militár nian duni hosi Falintil.

Iha 199, haruka nia bá iha Rejiaun Ponta Leste hanesan responsável prinsipál no komandante dahuluk rejiaun ne’e, no hela iha ne’ebá to’o funu remata, hafoin tina hitu maka nomeia nia nu’udar subxefe Estadu Maiór Falintil.

Iha jullu-1999, Lere maka sai hanesan responsável ba akontanamentu haat ne’ebé kria iha Timor-Leste ba Falintil sira, durante referendu.

Hafoin indonézia sira sai, maka iha 1-fevereiru-2001, promove ba postu koronel F-FDTL nian no iha fali 20-maiu-2002, bainhira komemora restaurasaun ba independénsia, maka nia asumi knar nu’udar xefe Estadu-Maiór F-FDTL, Falintil-Forsa Defeza Timor-Leste.

Iha 7-dezembru-2006, Lere Anan Timur hetan kondekorasaun hosi Prezidente Repúblika ho Orden Guerilla no nia mos simu tan iha 2007, tanba haree ba ninia partisipasaun durante operasaun ba estabilizasaun seguransa iha Timor-Leste, hafoin mosu krizi polítika iha 2006.

Iha 28-novembru-2009, Lere Anan Timur hetan promosaun ba brigadeiru jenerál nomós hanesan visi-xefe Estadu Maiór Jenerál F-FDTL nian no iha fali 19-maiu-2012 hetan kondekorasaun ho Kolár Orden Timor-Leste.

Hanesan aman hosi oan na’in ualu – maibé rua hosi feto uluk nian ne’ebé mate bainhira partu ba oan daruak.

SAPO TL ho Lusa 

Uza portugés iha Giné Ekuatoriál hanesan prosesu ne’ebé bele lori tempo naruk- CPLP


Utilizasaun lia-portugés iha Giné Ekuatoriál "hanesan prosesu ne’ebé bele lori tempu naruk", sekretáriu ezekutivu Komunidade Nasaun Lia-Portugés (CPLP) nian rekoñese horisehik iha Lisboa. 

Murade Murargy, ne’ebé intervein iha serimónia hodi selebra primeiru aniversáriu Giné Ekuatoriál halo parte iha organizasaun – ne’ebé konkretiza iha jullu 2014 -, subliña katak " aseitasaun iha Dili hnesan inísiu hosi prosesu integrasaun nian, no iha perkursu hotu ne’ebé tenke halo atu bele sente integradu loloos iha ita-nia leet".

Apoiu ne’ebé ekipa CPLP nian fó, responsável ne’e hatutan, tanba ne’e mak "importante tebes atu sira bele redús distánsia ne’ebé hafahe ita" no permite, "atu uza liafuan ne’ebé sira kostuma uza, retornu ba uma, ne’ebé sira pertense antes, maibé retornu ne’e lori prosesu".

Iha intervensaun badak ne’ebé loke sesaun ne’ebé hala’o horisehik lorokraik iha Lisboa, Murargy aborda kestaun ida ne’ebé polémika tebes hahú kedas hosi Giné Ekuatoriál halo parte iha CPLP, no hakarak ho utilizasaun lia-portugés: "Ita la bele rejeita tanba la ko’alia portugé, la halo parte iha ita-nia “maneira de ser”; família CPLP nu’udar família ne’ebé simu, ho domin", nia hakotu.

SAPO TL ho Lusa 

Olandés la’o hosi Dili ba Balibó hodi lembra tinan 40 jornalista sira mate


Ativista olandés Francis Janssen la’o kuaze kilómetru 130 entre kapitál Dili no sidade Balibó, hodi hanoin hikas tinan 40 jornalista australianu sira mate , iha fatin ne’e.

"Mosu ideia ne’e iha tinan ida ona. Ha’u hakark bolu atenaun ba kestaun impunidade iha kazu ne’e, rekorda jornalista sira-nia mate, atake ne’ebé ida ne’e hatán kontra liberdade espresaun no mós selebra independénsia Timor-Leste nian", nia hatete ba Lusa.

"Maibé hakark aproveita mós hodi bolu atensaun ba situasaun falta liberdade iha Papua Osidentál no iha Molucas ne’ebé kontinua okupa hosi Indonézia. Karik ha’u halo nune’e iha ne’ebá eme bele ka’er ha’u tanba la iha liberdade iha  zona hirak ne’e", nia afirma.

Janssen, tinan 47, sai hosi Dili horisehik no ohin besik ona iha lokalidade Maubara nian, iha ne’ebé tenke toba kalan, hein to’o iha Balibó iha loron 16 outubru, loron ne’ebé ema oho jornalista sira.

Gary Cunningham, Malcolm Rennie, Tony Stewart, Brian Peters no Greg Shackleton iha Timor-Leste iha problema asaun susesiva ne’ebé halo hosi partidu principal sira, Fretilin no UDT, no ambiente funu maun-alin, hili hosi Indonézia ba invazaun.

Jornalista na’in lima ne’e mate durante operasaun indonézia iha vila fronteirisa ne’e, iha antesipasaun invazaun totál ba Timor-Leste iha loron 07 dezembru tuir mai.

Jornalista sira hakfodak ho korpu forsa espesiál indonézia nian ne’ebé atravesa fronteira ho Timor-Osidentál, halibur sira iha uma ida, tiru mate sira no sunu sira-nia isin.

Lokál ne’e sai koñesidu tanba iha imajen sira ikus molok sira mate, Greg Shackelton pinta hela bandeira australiana no liafuan "Austrália", iha parede liur no rekorda liafuan ne’e ohin iha uma ne’ebá.

Jornalista sira-nia mate sai no, kontinua sai, hanesan argumentu ba atake polítika australiana durante okupasaun indonézia iha Timor-Leste.

Iha setembru tinan 2000, presaun hasoru asuntu ne’e halo Camberra admite katak governu australianu hatene katak Indonézia sei invade Timor-Leste iha tinan 1975.

Maibé iha momentu ne’ebá, ministru Negósiu Estranjeiru, Alexander Downer, la rekuñese katak iha koñesimentu ba atake iha aldeia fronteirisa Balibó nian iha outubru 1975, iha ne’ebé ema oho jornalista sira.

"Kalu katak ha’u hakarak atu halo justisa maibé ema sira ne’ebé iha tutun la hanoin hanesan ho sira seluk ", tenik Janssen.

Ativista ne’e esplika ba Lusa katak maski hatene katak Indonézia okupa Timor-Leste, nia interese aumenta hafoin masakre Santa Krús, ne’ebé akontese iha loron 12 novembru  1991.

Nia viajen la ‘ós rekorda de’it sira na’in lima iha Balibó maibé mós jornalista sira seluk ne’ebé mate iha Timor-Leste, liu-liu Roger East, ne’ebé mate iha Dili, iha loron 07 dezembru 1975, no Sander Thoenes, ne’ebé mate iha setembru 1999.

SAPO TL ho Lusa

Governu Timór analiza Orsamentu ba tinan 2016, to'o dolár rihun milloens 1,3


Konsellu Ministru horisehik foin maka analiza kona-ba projetu lei hosi Orsamentu Estadu tinan 2016 nian, sei bele to’o dolár rihun milloens 1,3 (euros milloens 1.163). 

Análize kona-ba dokumentu ne’e hala’o durante reuniaun estraordinária ida hosi Konsellu ministru, tuir informasaun ne’ebé Governu fó sai iha komunikadu ohin.

Komunikadu ne’e lafó sai kona-ba dadus hosi testu orsamentál nian, tanba únika valór ne’ebé previstu ba orsamentu refere maka fó sai ona iha setembru hosi Ministériu Finansas.

Iha tempu ne’ebá, Governu serbisu to'o dolár rihun milloens 1,3 no ida ne’e ko’a ona besik milloens 200, relasiona ba orsamentu 2015.

Redusaun ne’ebé tuun tanba polítika foun ne’ebé konservadora liu no kontensaun orsamentál hosi Governu, atu hodi haforsa liu tan kualidade ba iha despeza públika.

Tuir Ministériu Finansas fó sai katak área hirak ne’ebé maka sai prioridade maka edukasaun, saúde, agrikultura ho infraestrutura bázika, hanesan tendénsia iha tinan ikus ne’e.

SAPO TL ho Lusa 

Jacinto Group sei hasa’e kualidade traballador


DÍLI - Diretóra Jacinto Group Calricica Lay hateten  sei hasa’e kualidade traballlador timoroan tanba ohin loron timoroan barak mak seidauk iha kampu servisu.

“Hanesan timoroan tenke fó oportunidade ba maluk timoroan sira tanba tinan-tinan akaba husi ensinu sekundariu barak tebes no hanesan  akuntabilidade sei menus iha nasaun ida ne’e no ema ne’ebé professional iha area jestaun mos seidauk tanba ne’e presiza aumenta sira nia kualidade de servisu iha area sira ne’e,”hatete direitora Jacinto Group, Claricia Lay, ba Business Timor, iha Timor Plaza, 01/10 foin lalais ne’e. 

Diretóra ne’e mos haktuir katak trabalhador barak mak seidauk iha kualidade servisu ne’ebé diak, tanba ne’e sira sei hasa’e trabalahador sira nia kualidade ho prestasaun servisu ne’ebé diak.

“Iha jestaun barak maibe kualidade ladun diak no ita mos presiza ema ne’ebé iha saúde diak no balun mos baruk atu halao sira nia dever, balun badinas maibe laiha koñesementu kona-ba area ida ne’e, tanba ne’e ami presiza eduka sira ho prestaun servisu ne’ebé diak, maibe durante ukun an komesa rekruta ona ema ne’ebé kualidade diak maibe laos ema hotu hetan edukasaun husi eskola tanba ne’e iha kompañia ida-idak bele hasa’e netik 10% ba kualidade servisu ema nian,”diretora ne’e haktuir. Tuir diretóra ne’e katak bainhira kompañia hasa’e salariu, traballador sira mos tenke halao sira nia servisu ho diak. 

“Hau nia hakarak mais ou menus tinan ida hasa’e ne’e ema nia kualidade servisu to’o 10 % hanesan ne’e,tanba kompañia mak hasa’e hela deit salariu maibe sira la kumpri sira nia dever entaun ne’e sira nia prestasaun servisu ita bele dehan ladiak tanba ne’e tenke halaqo servu ne’ebé nia atu nune’e kompanhia mos bele hetan lukro ne’ebé diak”nia hatete. Nia mos informa katak agora dadaun trabalhador sira ne’ebé halao servisu iha kompañia refere hamutuk nain 200.

“Ami nia traballdor sira tama no sai to’o agora 200 pessoas no ami la rekruta foun tan ami so troka deit, iha kompañia foun mak ami foin rekruta foun, maibe tinan ida ne’e ami rekruta nain 10 resin tanba ami loke loja foun ida iha Mandarin no ami sei rekruta ema ba garmen,”informa nia. 

Nia mos aumenta tan katak salariu ba traballador sira iha kompañia refere ho montante $1.15 to’o $500.000 dolares. “Salariu ami nian ne’e komesa ho montante $1.15 to’o $500.000 dolares kada funcionariu maibe ne’e la inklui bonus seidauk inklui mos tunjangan nomos 13 mezes de salariu ne’e seidauk maibe hanesan asesor sira ami aumenta $500.000 ba leten,”Claricia haktuir. (BT)

Business Timor

Governu la defini produtu rai laran susar hapara importasaun


DÍLI - Timor-Leste sei susar atu bele hapara produtu importasaun tanba governu rasik laiha politika estratejia ne’ebé diak hadia produtu rai laran hodi  kompete iha merkadu. Eis deputadu Manuel Tilman hatete lia hirak ne’e ba Business Timor, iha nia rezidensia Pantai Kelapa, tersa (29/09), bainhira husu nia hanoin kona-ba politika oinsa minimiza tiha importasaun produtu estranjeiru ne’ebé Timor-Leste mos bele produs rasik.

Tuir nia haree katak agora daudaun Governu Timor-Leste laiha politika ida kona-ba produsaun no mos laiha politika estratejia atu denifi kona-ba produsaun ne’ebé importante atu produs iha rai laran. “Investimentu agrikultura ne’e iha ne’ebé? Karik investimentu boot mak selu deit ba iha funsionariu ministeriu agrikultura no peskas? Klaru que kordenasaun lojika mak dala ruma ita hakarak fali ba iha kotuk signifika katak tuir siensia ekonomika kuandu nasaun ida importante liu nia produsaun mak agrikultura signifika katak nia seidauk dezenvolvidu,” dehan Tilman ba BT.

Tuir nia katak  produtu lokal no produtu importasaun ligasaun ho ministru koordenador asuntu ekonomia. Problema numeru primeiru iha Timor-Leste mak la defini estratejia de produsaun  tanba normalmente produsaun kafé protugues sira mak husik hela  no TL  promove deit. “Produsaun sira iha rai laran hanesan foos, fehuk, talas no aifarina oras ne’e produsaun hanesan konsumu deit. Foos nudar produtu ida atu bele halo esportasaun karik nia kuantidade boot no kualidade ne’e diak atu bele halo kompetisaun iha merkadu internasional. Haree ba realidade pais nian produtu ne’ebé bele fo hodi fa’an fali iha merkadu internasional mak foos, maibe nia produsaun iha rai laran la liu 30%  hodi halo Timor-Leste importa foos 70% husi rai liur,” nia kestiona.

Nia afirma katak produsaun iha rai laran subtitensia deit iha konsumu iha uma laran atu han kuandu atu lori ba iha merkadu nian kuantidade menus signifika katak produsaun iha maibe komprador mak laiha osan atu sosa produtu rai laran. Tan ne’e ho kuantidade produsaun iha rai laran ne’ebé ki’ik susar atu bele hapara produtu importasaun mai iha rai laran. TL hakarak hapara produtu importasaun, merkadu tenke funsiona hodi bele fa’an produtu rai laran sira ne’ebé agrikultura sira produs.

“Wainhira ita hapara produtu importasaun mai iha rai laran hanesan foos, mina, masako, masin no mos produtu sira seluk ita sei funu boot maibe importante mak tenke regula. Signifika katak ministeriu Kordenador Asuntu Ekonomia tenke halo estudu estratejia ruma hodi bele fasilita ita nia agrikulturas sira kona-ba saida mak ita ita bele produs,” hatete Tilman.

Nia husu ba governu atu tenke muda estratejia produsaun iha rai laran, muda politika fo traktor gratuita ba iha povu, muda politika fila rai gratuita. Governu tenke defini produtu ne’ebé mak importante atu bele halo produsaun iha rai laran hodi bele hamenus produtu importasaun mai rai laran. Nia dehan bainhira laiha politika ida hodi defini produsaun rai laran susar atu rezolve problema sira liu-liu kona-ba produtu importasaun.

“Produtu rai laran seidauk sufisiente atu bele taka odamatan hodi konsumu deit iha rai laran tanba kuantidade menus, kualidade la diak no la fo nutrisaun ne’ebé diak ba populasaun sira, ezemplu hanesan ita iha kafé hakarak fa’an ba iha rai liur tenke hadia plantasaun kafé, tenke hadia produsaun háre iha rai laran, tenke hadia produsaun modo, koto, forekeli nomos produtu sira seluk,” dehan nia. (BT)

Business Timor

MUTL LABELE MONU BA LASU POLITIKU


Akademiku lubun boot ne’ebe hamahan an iha Movimentu Universitariu Timor Leste (MUTL) presiza haree didiak sira nia ejijensia kona-ba pensaun vitalisia. Basa, ejijensia hirak ne’e ‘falun’ hela politiku balun nia interese.

Lia hirak ne’e hato’o husi eis membru Parlamentu Nasional husi Bankada FRETILIN, Elizario Fereira, wainhira dada lia ho JNDiario iha nia servisu fatin, Sesta (9/10/2015).
Elizario tenik dehan, iunisiativa akademiku sira nian hodi halo manifestasaun ne’e kapas tebes, maibe akademiku sira la dun intende didiak problema luybuk ida ne’ebe ninia interese boot liu fali pensaun vitalisia.

‘’Hau agardese tanba akdemiku sira bele kulia, maibe ema politika sira soe buat ki’ik ida halo akademiku sira halai tuir ba buat ki’ik ne’e. Sira haluha tiha ba buat boo. Hau fo exemplu estrada iha Dili laran tinan ida taka dala rua ka tolu, akademiku ne’ebe mak hakilar, uma ida iha hudi laran ne’e halo iha 2013 ho osan pakote referendum nian to’o agora sai uma tuan ida la uza gasta osan deit akademiku ne’ebe mak kulia, korupsaun buras iha rai laran akademiku ne’ebe mak hakilar, negosiasaun fronteira maritima, mina folin tun, akademiku sira nusa la kulia,’’ Elizario kestiona.

Elizario hatutan, akademiku sira konsidera lei pensaun vitalisia la fo benifisu ba rai ne’e, signifika eis deputado sira ne’e la moris iha rai ne’e, sira moris iha Lalehan buat hotu mosu deit, sira mos ema bain-bain presiza nesesidade no sustenta familia, tan ne’e tuir prezidente Federasaun Hanai Malu katak nia konkorda bainhira dehan la fo kontribuisaun, tanba iha esi titulares balun simu hela pensaun vitalisia maibe ba hela tiha iha rai liur.

‘’Hau mos eis titulres. Kada fulan hau simu US$ 1.650, maibe selu tasa 10% entaun hau simu deit US$ 1.500, konserteza lori osan sira ne’e hau sustenta fali hau nia oan sira nia eskola inklui familia, hau hanesan prezidenti koperativa ne’e mos la hetan osan, hau uza osan pensaun vitalisia ne’e mak uza ba servisu, tun ba baze hasoru malu ho komunidade sira, ba aktividade koperativa nian no seluk tan,’’ afirma Elizario.

Elizario esplika katak, lei pensaun vitalisia ne’e aprova duni iha primeira legislatura. Momentu neba nia hanesan deputado neb eperdiam ba halo fiskalizasaun kada loron US$ 20 no ba pulsa, kombostivle no seluk tan ne’e, kada loron sira hetan U$D 2.50, Sira nia salariu baziku U$D 4.50 koa 10%.

“Iha lei ne’e hatete, eis deputado sira ne’ebe servisu manan salario basiku hanesan ho pensaun vitalisia US$ 1.650 konserteza la bele simu tan pensaun vitalisia, tanba ema ida iha direitu ida, maibe karik nia hetan salario baziku menus husi pensaun vitalisia ne’e nia bele simu nafatin i karik ita kulia pensaun vitaliasia la iha benifisu entaun pensaun ba veteranus sira mos la iha benifisiu, tanba lei pensaun vitalisia ne’e hola husi lei veteranus nian iha kordenasaun ba malu,’’ esklarese Elizario.

Elizario konsidera manifestasaun ne’ebe akademiku sira halo ne’e diak, tanba nasaun ne’e demokratiku, ema hotu iha direitu espresa sira nia hanoin, maibe importante mak tenki iha analiza no peskiza ba asuntu ne’ebe mak atu sai topiku importante iha manifestasaun ne’e.

Antes ne’e mos eis vise Primeiru Ministru (PM) Mario Viegas Carascalo mos husu ba akademiku sira atu halo manifestasaun ba buat ne’ebe mak importante liu, hanesan gasta osan ba ba rai liur lori delegasaun bot, maibe la halo buat ida. nia

Jornal Nacional

RAI BOOT SEI NA’OK RIKUSOIN TL


Prezidenti Partidu Congreso Nacional Reconstrução Timorense (CNRT), Kayrala Xanana Gusmão informa katak, Timor Leste (TL) sei hasoru dezafius barak iha rai laran ho rai liur tanba rai boot balun sei na’ok nafatin rikusoinnasaun ne’e nian.

“Fiar-an ba ita la’o nafatin ba oin hametin ita nia soberania tanba uluk kedas ema aproveita ita nia lamatenek hodi mai impoen ho ita maibé iha kotuk sira naok hela ita nia rikusoin i agora ita hamriik, ita la’os prepara-an ba funu maibé kuidadu bandida,” dehan Xanana ba kongresista sira iha Gleno, Ermera, Sábadu (10/10/2015).

Nia hatutan, TL lakohi ona funu, tanba ne’e maka ba nasaun seluk hanesan Afrika hodi dehan ba sira atu hakribit funu hodi lori povu ba moris di’ak.

Eis gerilleiru ne’e hatutan, hanesan uluk luta ba nasaun ne’e hetan ukun-an no agora mós sei la hakiduk hodi infrenta dezafius ne’ebé maka nasaun ne’e infrenta husi rai boot sira.

“Ha’u foin lalais ne’e ba Nova Iorke, ha’u ba la’os ha’u baruk ona ho nasoen unidas maibé ha’u ba atu koalia konaba ita nia soberania sei iha ema barak sai inimigu povu nian,” dehan Xanana.

Nia hatutan, Timoroan hotu tenki hamutuk hodi luta ba nasaun nia soberania, ne’ebé maka namlele hela, tanba ne’e maka tenki hanoin la’os deit responsabilidade atu dezenvolve rai ida ne’e, maibé buka defende rai ne’e hodi hatudu ba nasaun riku sira katak ida ne’e maka TL nia direitu.nes

Jornal Nacional

ABANDONA HARII HOTEL 5 ESTRELAS – GOVERNU HAPARA KONTRATU HO AGG


Sekretariu Estadu Terras no Propriadades (SETP), Jaime Xavier Lopes hatete, Governu sei fo notifikasaun hodi hapara kontratu ho kompañia Internasional Artha Graha Group (AGG) husi Indonesia, Tony Winata tanba abandona kontratu hodi harii Hotel 5 Estrelas iha Timor-Leste.

Hotel 5 Estrelas ne’ebé Estadu Timor-Leste kontrata ho Kompañia Artha Group Indonesia ne’e asina tiha kontratu ona maibe to’o agora kompañia ne’e rasik la halo konstrusaun ho razaun la klaru. Tanba ne’e mak Governu konsidera sira la halo tuir kontratu ne’ebé mak asina no bele entrega fali ba ema seluk.

Hotel 5 Estrelas ne’e nia lokalizasaun iha Kaikoli, Dili, tempu Indonesia nian Gedung Keuangan Negara.

“Ami sei koalia fila fali Ministeriu relevantes para depois fo notifikasaun ba kompañia refere hodi hakotu nia kontratu. Tanba tinan ne’ebe mak sira atu halo konstrusaun liu tiha ona, ne’e hanesan mos buat ne’ebe fo tiha ona ba sira, sira lakohi hahú sei hapara hodi fali ba ema seluk atu halo investimentu,”hatete Jaime Xavier ba jornalista sira, Sesta (09/10), iha salaun Sentru Formasaun Judisiariu Caicoli, Dili.

“ Hanesan mos Timor oan sira, ami fo kontratu tinan barak ona maibe sira lakohi hahú prontu, ami fo notifikasaun hapara kontratu fo fali ba ema seluk,” Jaime hatete tenik.

Jaime hatutan, antes atu halo notifkasaun hodi hapara ka hakotu kontratu, primeiru bolu sira (kompañia) mai hodi husu razaun saida mak la hala’o konstrusaun, nune’e se lakohi ona entaun Governu aplika ona ho lei.

Tuir Jaime Xavier katak, fatin ne’e la fo ba ministeriu ruma maibe atu halo investimentu. Tanba investimentu bele kria kampu servisu hodi hamenus numeru desempregu.

Antes ne’e fatin refere, Governu liu husi eis Primieru Ministru, Kay Rala Xanana Gusmão aktual Ministru Planemanetu Investimentu Estratejiku halo ona lansamentu primeiru pedra iha tinan hirak liu ba no fatin refere didin haleu ona ho kalen, maibe to’o agora kompañia refere seidauk halo kontrusaun no kalen ne’ebe mak didin ne’e balun monu no nakloke hotu ona.Des

Jornal Nacional

CNRT KONSOLIDA MILITANTES IHA ERMERA


Atu hametin estrutura partidu nian iha baze hodi hasoru eleisaun jerál iha 2017 mai, Partidu Congreso Nacional Reconstrução Timorense (CNRT), realiza konferensia munisipál, iha Munisípiu Ermera, Sábadu (10/10).

Iha konferensia ne’e alénde hili membrus estrutura foun partidu CNRT nian iha Ermera no mós iha militantes balun husi partidu seluk mak delara-an hodi afilia ba partidu CNRT.

Prezidenti Partidu CNRT, Kayrala Xanana Gusmão ha nia diskursu, enkoraza estrutura foun partidu nian no mós militantes partidu nian atu hametin nafatin partidu iha baze nune’e bele hetan nafatin konfiansa husi povu hodi bele manan vitória iha eleisaun jerál 2017.

“Imi hotu maun, alin, feton di’ak ita maka tenki hametin partidu tanba ita hotu tenki tau iha ita nia neon ho laran katak povu maka ita nia partidu, tanba ne’e tama iha partidu atu lori povu ba di’ak. I husu ba delegadus ne’ebé maka tuir konferensia nivel Munisipiu iha Ermera atu tau hanoin ida iha fuan katak tama partidu CNRT atu lori povu ne’e ba moris diak,” hateten Xanana Gusmão iha nia diskursu iha seremonia konferensia partidu nian iha Munisípiu Ermera.

Xanana Gsumão afirma, partidu atu hetan konfiansa nafatin, depende mós husi estrutura partidu ninian iha baze ba servisu ne’ebé maka hala’o iha militantes no simpatizantes nia leet.

“Buat hotu hala’o tiha ona iha tinan 2016 ba 2017 povu hein hela Partidu CNRT, povu presiza partidu ida ho nia hanoin atu lori sira ba moris di’ak, ida ne’e iha militantes no delegadus sira nia liman buka hakas-an hodi bele lori duni povu ne’e ba di’ak,”hatutan Xanana.

Nia hatutan, partidu barak maka sei mosu ne’e sira nia direitu, nasaun demokratiku ne’e normal la iha lei ruma maka bandu ema atu hari’i partidu la iha dalan atu nia taka dalan ba partidu seluk.

“Maibé ita bo’ot sira halao konferensia koalia ba malu simu malu ita konsolida ita nia partidu hodi hanoin katak ita tama iha partidu ne’e lori povu no rai ne’e ba diak,” dehan Xanana.

Domingos eleitu ba koordedor

Entretantu liu husi konferensia iha Munisípiu Ermera ne’e Domingos L. Lemos eleitu sai nu’udar koordenador Partidu CNRT nian iha munisípiu Ermera, tanba ne’e promete hametin partidu CNRT iha baze hodi hasoru eleisaun jeral 2017 hetan nafatin konfiansa husi povu.

“Konfiansa ida ne’e todan boot ida, tanba sai hanesan koordenador maibé nia ho estrutara tomak hakas an hodi alkansa metas ne’ebé maka partidu nia hakarak, iha eleisaun tinan 2017 nian. Hakarak ka lakohi ami tenki relaiza kompremisiu ne’ebé maka ami fo sai ona iha kampaña hamutuk ho ami nia estrutura tomak hodi alkansa objetivu partidu nian,”dehan Domingos Lemos.

Nia hatutan, komprimisu ne’ebé nia halo sei implementa e sei kria linha kordenasaun ida que diak ho estrutura nasional nina para planu ne’ebé estruktura halo lao ba oin nafatin.

“Ami nia aktividades prinsipal primeiru ne’ebé maka ami atu hala’o maka konsolidasaun ba ami nia militantes sira hodi nune’e bele atinji objetivu partidu nian,”nia esplika.

Iha fatin hanesan Koordenador CNRT Rejiaun 4, Vigílio Smith hateten katak, rejiaun 4 kompostu husi sub-rejiaun tolu ne’ebé maka nia rasik lidera hanesan sub-rejiaun Liquiça, Ermera, no Bobonaro, hein katak iha eleisaun tinan 2017 rejiaun 4 ne’e sei vota susesu ba partidu CNRT.

“Ami orgullu boot tanba konferensia ne’e bele realiza iha sub-rejiaun Ermera, ami hato’o agradese barak ba estrutura Munisípiu Ermera ne’ebé maka bele to’o iha nurep sira hodi lori susesu ba ita,”dehan Virgílio Smith.

Militantes UNDERTIM 1.200 afilia ba CNRT

Iha momentu ne’ebé hanesan, militantes Partidu UNDERTIM Munisipiu Ermera hamutuk na’in 1.200 afilia ba Partidu CNRT.

Koordenador UNDERTIM Munisípiu Ermera, José Barreto hateten, nia lori militantes hamutuk 1.200 tama hikas partidu CNRT, tanba fiar katak partidu ne’e maka sei lori povu ba moris di’ak, no bele atende nesesidade povu iha area rurais.

“Ha’u haree ba partidu CNRT maka partidu povu nian nia maka sei lori povu ne’e ba moris diak no defende soberania nasaun ninian,”tenik Jose Barreto.

Nia hatutan, militantes Partidu UNDERTIM nian ne’ebé maka afilia ba CNRT ne’e la’os ema ruma maka obriga, maibé tanba sira haree ba politika partidu ninian no mós partidu CNRT maka nu’udar partidu alternativu ba povu.

“Ha’u la ba obriga sira atu tama CNRT maibé tanba ami hotu nia konsensia rasik maka ami afilia ho razaun partidu CNRT maka bele lori povu ba moris di’ak, ho ida ne’e maka ami na’in 1.200 mai integra-an ba CNRT,” nia klarifika.

Nune’e mos Prezidenti CNRT Kay Rala Xanana Gusmão hateten odamatan partidu CNRT nkloke ba ema hotu atu tama, ne’e duni partidu CNRT simu militantes UNDERTIM   ho laran luak hodi hamutuk ho CNRT luta ba povu nia diak.

“Ami simu imi mai ita hamutuk lori CNRT ba oin, ita maka futuru ba Partidu nian,” Xanana haklaken.

Iha okaziaun ne’e Koordenador Partidu UNDERTIM nian hetan kedas kamizola husi partidu CNRT nian no sai ona hanesan militantes partidu CNRT nian.

Konferensia ne’e partisipa husi delegadus hamutuk na’in 500 resin mai husi postu administrativu hotu iha Munisipiu Ermera laran tomak.nes

Jornal Nacional

ONU APRESIA POLÍTIKA TIMOR LESTE


Sekretáriu-Jerál Nasoens Unidas, Ban Ki-Moon, apresia tebes polítika no papel nasaun foun Timor-Leste nian ba dezenvolvimentu sustentavel 2030.

Ban Ki-moon hato’o apresiasaun hirak ne’e, bainhira hasoru malu ho Primeiru Ministru Rui Maria de Araújo iha Nova Iorke.

Primeiru Ministru Rui Maria de Araújo ho ninia delegasaun fila hika’as ona mai Timor Leste iha loron Sabadu (10/10), ho aviaun Silk Air. PM Rui ho nia delegasaun to’o iha Aeroportu Internasionál Nicolau Lobato tuku 2:00 Otl.

Bainhira jornalista sira koko atu husu Xefi Governu ne’e kona-ba ninia vizita ba Nova Iorke no Cuba ne’e, Xefi Governu lakohi fó komentariu ba públiku tanba kole ho viazen ne’ebé dok tebes.

Primeiru-Ministru, Rui Maria de Araújo, hala’o sorumutuk badak ida ho Ban Ki-moon iha Nova Iorke, molok halo abertura Simeira ba adosaun Ajenda Dezenvolvimentu pós-2015, hodi agradese apoiu nasoens unidadas durante ne’e fó mai Timor Leste.

“Sekretáriu-Jerál agradese papél Timor-Leste nian iha elaborasaun Ajenda ba Dezenvolvimentu Sustentavel 2030 nian foun, no liuliu iha ninia knaar durante prosesu dezenvolvimentu objetivu 16: Pás, Justisa no Instituisaun Forte,”dehan PM Rui Araújo.

Nia hatutan, Ban Ki-Moon fó mós parabens ba Timor-Leste, ba susesu ne’ebé hetan ona dezde independénsia.

Iha sorumutu ne’e, Ban Ki Moon dehan, nasaun barak maka konsidera Timor Leste hanesan ezemplu estabilidade no kresimentu ekonómiku nian.

Ban Ki Moon mós espresa ninia apresu ba kontribuisaun eis Prezidente da Arepúblika, José Ramos Horta, ba serbisu ne’ebé nia hala’o iha Giné-Bisau no iha Painél Indepente Nivel Aas nian, kona-ba Operasaun Pás Nasoins Unidas nian sira.

Alende ne’e, Primeiru-Ministru Rui Araújo informa ba Sekretáriu-jerál ONU katak, Konsellu Ministrus Timor-Leste nian, aprova ona Objetivu Dezenvolvimentu Susutentavel nian, hodi sai ona hanesan parte husi estrutura polítika nasaun ne’e nian, no iha kompromisu sériu iha implementasaun Ajenda ne’e nian.

Rui Maria de Araújo mós informa kona-ba polítika hirak ne’ebé, Governu introdús dadaun ba formasaun joven Timor-oan sira no iha kriasaun oporunidade serbisu nian, dezafiu ne’ebé hanesan ba nasaun barak husi g7+.

Antes atu fila hikas mai Timor Leste, Xefi Governu Timor Leste ne’e, ho ninia delegasaun halo mós vizita traballu ba Cuba, hodi kumpri konvite ne’ebé mai husi Prezidente Repúblika Cuba, Raul Castro.

Vizita ofisial PM Rui Araújo nian ba Cuba ne’e, akompaña husi Ministru Negosius Estranjeirus ho Ministru Koordenador Asuntu Sosial nomós Ministra Saúde, atu reforsa kooperasaun ne’ebé iha tiha ona.

Iha vizita ba Cuba ne’e, PM Rui ne’ebé Xefia delegasaun Timor Leste ne’e, hato’o mós agradesementu ba Cuba, ba sira nia apoiu tomak ne’ebé durante ne’e Cuba halo mai Timor Leste, hahú kedas iha tinan 2004.

Iha parte seluk, Vice Ministru Negosius Estranjeirus i Kooperasaun (MNEK), Roberto Soares hatete katak, vizita Primeiru Ministru Rui Maria de Araújo ba Nova Iorke ne’e, akompaña husi Ministru Negosius Estranjeirus, Hernani Coelho.

Nia hatutan, PM Rui Araújo la’os hala’o de’it vizita traballu ba Nova Iorke, maibé hala’o vizita mós ba Cuba.

“Iha Nova Iorke ita nia Ministru Negosius Estranjeirus, akompaña ita nia Primeiru Ministru iha sesoens espesial sira ne’ebé ke ajenda tiha ona hanesan, ligasaun ba iha komrensia sustenablidade ba dezenvolvimentu ninian, i mós kona-ba mudansa klimátika ninian,”relata Roberto Soares ba jornalista sira iha MNEK Dili, Sabadu (10/10).

Nia esklarese, ida ne’e atu kontinua nafatin kontribui Timor Leste ninia prespetiva iha ambitu atu asegura kestoens sustentabilidade dezenvolvimentu no klimátika ninian.

PM Rui Araújo ho ninia delegasaun halo vizita ba Nova Iorke no Cuba durante loron 18, tanba sai husi Timor Leste iha loron (22/9), no to’o fali iha Timor Leste iha loron (10/10).cos

Jornal Nacional

US$ 50.000 BA MANUTENSAUN TRAKTORES


Ministru Estadu Kodenador Asuntu Ekonomia no Ministru Agrukultura e Peskas (MAP), Estanislau Aleixo da Silva hatete, MAP aloka orsamentu ho montante US$ 50.000 hodi halo manutensaun ba traktores.

‘’Kondisaun traktores sira ne’e at duni tenki halo manutensaun I numeru traktores ne’ebe mak atu halo manutensaun ne’e hamutuk 30, iha fatin balun hotu ona, fo ba iha kompania rua, kompania ida kaer traktores sira iha parte Leste ho Oeste,’’ informa Ministru Estanislau Aleixo da Silva ba jornalista sira iha Comoro, Sesta (09/10/2015).

Estanislau hatete, kompania ida deit la iha kbit para atu halo manutensau lalais, tanba hand tarktor, ne’e duni agora kompania sira rekolha hela hodi halo hela manutensaun ba traktores medium no traktores bot sira ne’e I tarktor balun uluk ministeriu fob a grupu sira ne’e lakon tiha deit grupu sira ne’e mos la hatene iha nebe.

‘’Manutensaun ne’e iha grau oin-oin,iha manutensaun rotina ne’e ba traktor sira ne’eebe mak troka deit ol,no sira ne’ebe tenki hadia duni,tanba iha kondisaun seluk tan,” kulia Estanislau.

Iha fatin hanesan direitor Agrikultura e Pecuaria, Januario Marcal, esplika, posesu ba manutensaun traktores tinan ida ne’e foin halo tender,no bainhira tender ne’e hotu,foin bele hatene ba kompania ida ne’ebe mak atu sai manan nain. “ kompania ida ne’ebe mak sei hamutuk ho ministeriu tun ba iha terenu hodi halo manutensaun ba traktores sira ne’ebe mak ita identifika ona para atu hadia ou halo manutensaun, ne’ebe atu halo manutensaun ba traktores sira ne’e, ninia tender sei iha prosesu nia laran,” esplika Januario. nia

Jornal Nacional

MAP SEI INVOLVE JOVEN IHA AGRIKULTURA


Ministru Estadu Kodenador Asuntu Ekonomia no Ministru Agrukultura e Peskas (MAP), Estanislau Aleixo da Silva hatete, iha tinan ona mai, MAP sei tau programa espisifku oinsa tau joven sira sira iha vida agrikultura.

‘’Ne’e hanesan involvementu joven sira, tanba ita ba foho hare ema ne’ebe mak fila rai ne’e barak liu ho idade ferik katuas ona, joven sira ne’e halai mai hotu cidade no kapital municipiu sira, entaun ami iha programa espisifiku ami tau nia orsamentu para tinan oin mai involve ona joven sira,’’ dehan Estanislau ba jornalista sira iha Comoro, Sesta (09/10/2015).

Estanislau hatete, programa ne’e sei la fo empregu ba jovenu hotu no la involve joven hotu, maibe pelemenus MAP bele hahu ona ho buat kik oan balun hodi bele ajuda joven sira liu husi dalan agrikultura. Tanba tuir Estanislau agrikultura mos parte ida husi servisu. Nia

Jornal Nacional