ASESOR INTERNASIONAL LABELE TAMA KOMISAUN REFORMA JUDISIÁRIU

Jurista Manuel Tilman, husu ba Governu atu labele involve asesor internasional sira iha komisaun reforma judisiáriu ninian, tanba mainatu ida labele mai deside fali liberdade sidadaun ida nian iha nasaun ida.

“Se Involve Asesor Internasionál sira ne’e, diak liu husu Timor fila ba Indonesia, para tekinika sira iha Indonesia mai halo sistema judisiáriu, ita aplika deit sistema judisiáriu Indonesia nian, ou husu fila fali ba Portugal no independensia ne’e so’e tiha,”katak Manuel Tilman ba jornalista sira iha nia kna’ar fatin Hotel Garden Beach Dili, Sesta (28/8).

Manuel Tilman dehan, hanesan Timor-oan, nia la simu kuandu atu halo deit reforma konstituisaun rasik, tenke involve fali asesor internasional sira ne’e, hodi loke hotu segredu nasaun nian ba nasaun seluk.

“La’os ba hili fali bainatu ida mai atu deside sidadaun ida iha rai ida ninia liberdade, ninia vida no ninia sasan. Ida ne’e so Ministru ida ne’ebé laiha konsensia mak bele defini buat ida hanesan ne’e,”katak Tilman.

Prezidente Partidu KOTA ne’e hatutan, Avo sira uluk la eskola no lahatene hakerek, maibé nunka mais atu bolu mala’e mutin sira atu mai halo justisa iha rai ida ne’e. ne’eduni Tilman afirma, kuandu ohin loron povu Timor Leste independensia ona, veteranus sira ne’ebé terus no mate durante tinan barak nia laran, sira mak iha direitu atu partisipa iha komisaun ida ne’e.

“Ba ha’u, asesores laiha komptensia atu reforma nen lei judisiar ida iha rai ida ne’e, so povu Timor Leste ne’e, beik lahalimar, maubere foho mós nia preserve hela, saida mak justisa,”tenik Tilman.

Nia esplika, veteranus sira mós bele iha hanoin katak, atu reforma judisiáriu hodi define kaer ema ida hatama ba kadeia. Maibé Tilman kontinua kestiona katak, ema polítika ida labele define fali judisiáriu .

“Polítika labele ba define katak, ema tama iha fronteira ne’eba ne’e, tama arbiru deit, no kuandu polisia kaer ema ne’e, nia dehan katak labele, ministru haruka labele kaer ha’u. ida ne’e sala bo’ot, atu komunismu rai ne’ebé deit mós la aplika hanesan ne’e,”relata jurista ne’e.

Tilman dehan, nia konkorda ho hanoin Governu nian atu forma komisaun ida hodi halo reforma ba judisiáriu, maibé Tilman dehan, iha komisaun ne’e nia laran, tenke involve juiz, prokuradores, defensores públika no advogadus Timor-oan sira, labele ema polítika deit.

“Buat ne’e, tenke tama iha Governu nia kakutak, Governu ne’e la’os beik ten ida. Governu nia kakutak ne’e dehan katak, atu reforma orgaun soberania Tribunais, lahatama ema nasionál origionariu ne’ebé mak iha intrese ba vida sidadaun individual ka poletivu rai ida ne’e nian, Governu laiha kompetensia,”afirma Tilman.

Eis deputadu ne’e dehan, mandatu Governu ida ne’e hela deit tinan ida ho balu, sei labele halo reforma judisiáriu.cos

Jornal Nacional