sábado, 30 de maio de 2015

PR TAUR INAGURA PONTE BEALI


Prezidente Repúplika (PR), Taur Matan Ruak, Kinta (28/05), inaugura ponte Beali, Suku Hatulia, Postu Administrativu Hatulia, Munisípiu Ermera, ne’ebe fundus apoiu husi Projetu Programa Nasional Dezenvolvimentu Suku (PNDS), ho osamentu US$ 48, 750,00.

Seremonia inaugurasaun ba ponte refere, akompaña husi Sekretariu Estadu Dezenvolvimentu Interna, Samuel Mendonça, autoridade sira husi Munisípiu Ermera, Postu Administrativu Hatulia ho komunidade sira ne’ebe partense ba Suku refere.

Hafoin inaugura ponte ne’e, PR Taur fo parabens ba komunidade sira ne’ebe servisu halo ponte ne’e tanba kualidade diak.

“Ha’u fo parabens ba imi tanba imi halo milagre, imi mak ukun Timor karik lalais deit tanba ho deit osan US$ 48, 750,00 maibe halo buat ne’e todan ho kualidade diak tebes,”hatete PR Taur ho kontente.

“Imi iha ne’e halo buat ne’ebé ema seluk labele halo tanba imi hotu nia involvementu, buat ne’ebe todan sai kman,” hatete tan PR Taur.

Iha fatin hanesan, Xefi Aprovizionamentu PNDS Suku Hatulia Carlos Martins hatete, obra ba ponte ne’e hahú iha fulan Agostu tinan 2014. Durasaun ba halo ponte ne’e fulan 4 nia laran, ne’ebe termina iha inisiu 2015. No osan ne’ebe aloka ba projetu ne’e mai husi PNDS hamutuk 48,750, maibe uza deit US$ 39,000 restu rai hela iha Banko.

“Traballador sira ne’ebe mak servisu ba projetu ne’e mai husi Aldeia 4 ne’ebé partensia ba Suku ne’e nian. Kada semana-semana ema nain hitu (7) troka malu,” hatete Carlos.

“Hanesan Suku Hatulia oan senti kontenti tebes ho ponte ne’e bele ajuda no fasilita ami nia movimentu diak liu tan husi Suku ida ne’e ba Hatulia vila iha tempu udan no mos bele asesu ona transporte publiku,” dehan nia.

Iha oportunidade ne’e mos, Julio Soares hanesan komunidade Suku Hatulia hatete, nia parte agredese ba Governu tanba bele tau osan hodi hadia sira nia ponte ne’ebe liga ba sira nia Suku no mós ba Postu Administrativu Hatulia.

“Uluk ponte ne’e seidauk iha, kuandu udan bo’ot mota Beali bo’ot ami no oan sira ne’ebé eskola labele liu ba mota sorin hodi ba eskola iha Hatulia vila maibe agora ho ponte ne’ebe iha bele ajuda ami ba mai diak ona no kareta mós bele asesu tama ami nia Suku ona,” hatete Julio.

Nia husu ba Governu atu kontinua ho programa PNDS ne’e tanba bele fo benefisiu ba komunidade iha Suku ne’e, tanba projetu ne’e kaer diretamentu husi komunidade.Nev

Jornal Nacional

Sem comentários: